Roza Metîna: Rojnamegerîye pawitişê heqîqetê komelî ya 2025-10-06 12:04:22   Rabîa Onver   AMED - Rojnamegerê cinî têkoşînê xo yê rêxistinkerdişê hemverê zordarî, sansûr û hedefgirewtîşê hukmatanê ke hetê mêrdan ra yenê îdarekerdiş xurt kenê. Sereka MKG’yî Roza Metîna va: “Rojnamegerîye semedê pawitîşê rastîya komelî têkoşînêk a. Cinîyê rojnamegerî qet qelema xo nêdanê ro û do qetî zî nêdê ro.”   Rojnamegerê cinî hemverê zordarî, şîdet û polîtîkayanê sansûrî yê ke hetê sîstemê serdestî yê mêrdan ra çapemenî de virazîyenê, bi têkoşînê rêxistinkerdişê bîyayîşê xo hîna xurtêr kenê. Pawitîşê heqê komelî yê agahdarbîyayîşî sey xoverdayîş vînenê û teberê hêriş, destbendkerdişî, ceza û tehdîdan zî, pey rastî de şînê. Komeleya Rojnamegeranê Cinîyan ê Mezopotamyayî (MKG), bi îradeyê ke bibo vengê cinîyan û qelema rastîye, têkoşînê çapemenîya azad ê bingehê cinîyan ser hemver ziwanê yewperest, cinsperest ê medyaya serdestî ya mêrdan hîra kenê.   Sereka MKG’yî Roza Metîna rojnamegerîye sey warêkê têkoşînî pênase kerd û va ke înan hemverê zordarî, sansûr, destbendkerdiş, tepiştiş û hedefgirewtîşê cinîyanê rojnamegeran xetêk rêxistinkerde awan kerdo. Roza Metîna va: “Rojnamegerîye pawitîşê rastîya komelî ya. Ma, rojnamegerê cinî, bê ke qelema xo danê erd xoverdayîşêk girdî kenê, ma îdîa kenê ke ma vengê cinîyanê kurdan û cinîyê ke çar hetê dinya de yê. Roza Metîna va ke awankerdişê MKG’yî berardişê hewlêkê semedê xurtkerdişê pêgirewtiş û rêxistbîyayîşê rojnamegeranê cinîyan o û qetî kerd ke înan bi qelema xo rastîyê tarîtîya îqtîdaran eşkera kenê, hemverê nê tarîtîye de xoverdayîş kenê.   ‘Ma rojnamegeranê cinîyan dir binê sîwanê MKG’yî de ameyî têhet’   Roza Metîna bale ant ser muhîmîya rojnamegerîya komelî de û va ke sey rojnamegere, ê muhîmî û qîymetêk pîl danê meslegê xo. Roza Metîna va: “Rojnamegerî zî warêkê xoverdayîşî yo. Meslegê rojnamegerîye komelî de warêkê têkoşînî yo. Sey rojnamegerê cinî, ma waşt ke komelî de hîna zêde xo nîşan bidê. Ma waşt ke rêxistin û destekdayîşê xo rojnamegeranê cinîyan dir hîna xurt bikerê. Ma MKG awan kerd ke hemverê hêrişan de vinderê û rojnamegeranê cinîyan dir destekdayîş xurt bikerê. Ma rojnamegerê cinîyan binê sîwanê MKG’yî de ameyî têhet. Verê komele, ma Platformê Rojnamegeranê Cinîyan ê Mezopotamyayî awan kerd, binê banê platformî de wextê rewşa awarte ya tewr xidar de ma xebatanê xo kerdî. Dima ra ma qerarê awankerdişê komelaya MKG’yî da û 7ê teşrîna verênê de ma awankerdişê xo îlan kerd.”   ‘Zaf rojnamegerî wextê ke xebata xo kerdî qetil bîyî’   Roza Metîna va ke ê binê sîwanê MKG’yî de semedê rojnamegeranê cinîyan waranê cîya-cîya de atolyeyî kerdî û her aşme raporê binpaykerdişê heqanê cinîyanê rojnamegeran bi raya pêroyî par kenê. Roza Metîna va: “Ma çalakîyanê yadkerdişî de cangorîyê çapemenîye zî yad kenê. Ma vengê rojnamegeranê cinîyan yê zîndanî yê. Ma her tim piştgîrîya xo semedê cinîyê ke zîndan de yê eşkera kenê. Ma dewanê rojnamegeranê cinîyan yê ke yenê muhakemekerdiş taqîb kenê. Eynî wextî de ma sey MKG’yî wazenê sîwanê xo hîna hîra bikerê. Ma nêzdî de şaxê xo yê MKG’yê Wanî akerd. Zaf bajaran de temsîlkarê ma zî est ê. Ma her bajarî de hemverê nê zordarî, şîdet û hedefgirewtîşê cinîyanê rojnamegeran de xo ver danê. Cinîyê rojnamegerî binê şertanê zaf xidaran de xebate kenê. Nimûne, Başûrê Kurdistanî de Gulistan Tara, Hêro Bahadîn û Nagîhan Akarsel bi zanebîyayîş hedef ameyî girewtiş û qetil bîyî. Rojhelatê Kurdistanî de zî cezaya dardekirdişî cinîyanê sey Pexşan Ezîzî ser o dayî. Eynî wextî de Cîhan Bilgin û Nazim Daştan zî wextê ke meslegê xo yê rojnamegerî kerdî, Awbendê Tişrînî de qetil bîyî.”   Vengdayîşê semedê Merasîmê Xelatanê Rojnamegerî ya Gurbetellî Ersoze   Roza Metîna, peynî de, veng da temamê rojnamegeranê cinîyab ke binê banê MKG’yî de bêrê têhet û va: “Ma wazenê her kes her wareyî de û her şertî de çapemenîya azad ko bikero. Rojnamegerîye vengê rastîya komelî ya. Semedê xurtkerdişê komelî û qetîkerdişê aştî, çapemenîya azade lazim a. Semedê nê, vengdayîşê ma no yo ke her kes çapemenîya azade rê wayîr vejîyo. 8ê teşrîna verênê de Çandamed ê Amedî de Merasîmê Xelatdayîşê Cinîyanê Rojnamegeran ê Gurbetellî Ersoz do bêro kerdiş. Armancê na musabaqa wayîrvejîyayîşê keda cinîyêanê rojnameger o. Semedê ke ma na kede rê wayîr vejîyê, ma do tîya bê. Lazim o temamê rojnamegerê cinî a rojî de tîya bê û na roje rê wayîr vejîyê.”