‘Semedê kultur û hunerê kurdî ganî têkoşîn bêro dayîş’

2025-07-03 12:23:44


	 

	Nazlican Nujîn Yildiz 

	 

	WAN - Cinîyê ke tewrê Şayîya Wisarî ya Erdîşî bî dîyar kerdî ke semedê kultur û hunerê kurdî bêro ciwîyayîş, ganî nê bernameyî dewam bikerê.

	 

	Qirkerdişê kulturî yê fehmê netew-dewlete ardo dewam keno. Kurdistan de qirkerdişê kulturî dewam keno. Şar hemverê nê qirkerdişî de bi serran o semedê kultur û ziwanê xo bipawê têkoşîn kenê. Demê peyîn de Kurdistan de festîvalî pê yenê û eleqeyêk pîl vînenê. Nînan ra yew zî Şayîya Wisarî ya Erdîşî ya ke şaredarîya Erdîşî pê ardî bî.

	 

	Cinîyan bale ant serê vengdayîşê Rayberê Şarê Kurdî Abdullah Ocalanî yê 27ê Sibate de kerdo û va, semedê aştîye ganî kultur, ziwan û hunerê kurdî nêro astengkerdiş.  

	 

	Derya Çelîk dîyar kerd ke ê semedê şayîyê bi nê rengî xeylêk keyfweş ê û va: “Ma bi deyîranê xo serberz benê. Bi ziwanê xo serberz ê. Hunermendê ma yenê festîvalan. Ma demê weşî ciwîyenê. Vernîya nê ‘Festîvala Bendê Maseyan’ estbî. Tîya zî deyîrê bi ziwanê ma estbî. Ma kurd ê. Ma şarê tîya yê. Ma wazenê bernameyê wina dewam bikerê.”

	 

	‘Ma aştîye wazenê’ 

	 

	Rabîa Guney zî derheqê festîvale de wina va: “Ma hunermendanê kurdan ra hes kenê. Ma aştîye wazenê. Ma heta peynî aştîye pawenê. Ma wazenê bi kultur û ziwanê xo biciwîyê. Xeylê reyan destûr nêdanê hunermendanê kurdan. Ma wazenê hunermendê ma bêrê.” 

	 

	Leyla baydar zî dîyar kerd ke ê bernameyanê wina ra keyfweş ê û wina va: “Ganî bernameyê wina zêde bibê. Ma aştîye wazenê. Zirarê kurdan kesêk rê çin o. Aştî weş a. Ma têduştî û yewîye wazenê.”

	 

	‘Bi xêrê nê bernameyan şar xo nas keno’ 

	 

	Şahsenem Keleş zî dîyar kerd ke ê wazenê proses  bi serkewtiş netîce bibo û wina va: “Nê şayîyê winasî ma keyfweş kenê. Komel xêrê nê bernameyan xo nas keno. Xo xo vîr ra nêkenê. Ma hêvîdar ê do hîna baş bo.”

	 

	Seyran Yilmaz zî dîyar kerd ke şayî xeylêk weş derbaz bîya û va: “Kurdî nê bernameyan de yenê têhet. Her çî weş derbaz beno. Proseso ke ameyo destpêkerdiş zî weş o. Ganî kurdî xo nas bikerê. Bêrê têhet. Hêvîya ma aya ke proses baş netîce bibo û çîyê weş pê bêrê.”