‘Ma sey hunermend vengdayîşê aştîye ra bi hêvî yê’

2025-07-02 10:49:45


	 

	Nazlican Nujîn Yildiz

	 

	WAN- Endama Koma Sorjiyan Mizgîn Irmak dîyar kerd ke ganî şar hemverê polîtîkayê asîmîlasyonê hemverê kultur û hunerê kurdî wayîrê kulturê xo vejîyê û cinî her wareyî de hedefê hêrişan de yê do têkoşînê xo dewam bikerê. Mizgîn Irmake bale ant serê vengdayîşê Rayberê Şarê Kurdî Abdullah Ocalanî yê 27ê Sibate û va, ê sey hunermend nê vengdayîşî ra bi hêvî yê.

	 

	Endama Koma Sorjiyan Mizgîn Irmak ke tewrê Bernameyê Wisarî yê Erdîşî ke şaredarîya Erdîşî de pê ardî, derheqê muhîmîya bernameyê ke yenê kerdiş de qisey kerd.

	 

	Mizgîn Irmak dîyar kerd ke şar hewce bi bernameyê winasî vîneno û va, ganî wareyê kultur, ziwan û hunerî de bernameyê wina bêrê dewamkerdiş û va: “Ganî şar wayîrê kultur, ziwan û hunerê xo vejîyo. Vengdayîşê ‘aştî û komelê demokratîk’ ê Rayberê Şarê Kurdî Abdullah Ocalanî pîroz o. Ma sey hunermend prosesî ra bi hêvî yê.”

	 

	‘Ma wayîrê kulturê xo vejîyê’

	 

	Mizgîn Irmak dîyar kerd ke kultur û hunerê kurdî hedefê polîtîkayê asîmîlasyonî de yo û wina va: “Kultur û ziwanê kurdî yeno astengkerdiş. Ziwanê hîkayeyan, deyîrê kurdî yenê vurnayîş. Hewl danê ke bidê vînîkerdiş. Bi berardiş û têkoşînê hunermendanê kurdan ma deyîran û ziwanê xo îfade kenê. Yewin waştişê ma no yo. Ma wayîrê ziwan û kulturê xo vejîyê. Festîvalê winasî zaf muhîm û pîroz ê. Hêvîdar a festîvalê winasî dewam bikerê.”

	 

	‘Ganî cinî wareyan de bê’

	 

	Mizgîn Irmak tewr peyîn wina va: “Her wareyî de cinîyan ser o hêrişî est ê. Cinî yenê qetilkerdiş, bi rehetî kuçeyan de nêeşkenê bigeyrê. Yê ke nê hêrişan kenê zî bêceza yenê verdayîş. Ganî ma cinî her wareyî de kulturê xo, hunerê xo îcra bikerê. Cinî wexto ke îcra kenê, xeylêk zehmetîyan dir yenê rî bi rî. Xeylêk kesî semedê deyîranê kurdî vanê, yenê tepiştiş. Vengdayîşê Abdullah Ocalanî tesîrêk pîl wareyê kulturî û hunerî ser o zî kerd. Vengdayîşêk pîroz o. Ma vengdayîş ra xeylêk bi hêvî yê. La yew hetî nêbeno. Ganî heto bîn zî berpirsyarîyê xo bica bîyaro.”