Civînên jinan didomin 

2025-08-29 11:57:23


	 

	AMED - Gerînmendetiya Polîtîkayên Jinan a Şaredariya Peyasê, di çarçoveya kampanyaya bi navê "Gotina Me Neqediya ye, Em ê Tundiyê Bi Hev re Bisekinîn" de ku li dijî tundiya li ser jinan dest pê kiriye, bi çalakiyên xwe jinan tîne ba hev. Kampanya, îro bi meşek û şahiyekê wê bi dawî bibe.

	 

	Di çarçoveya kampanyayê de, Gerînendetiya Polîtîkayên Jinan a Şaredariya Peyasê civînên jinan bê navber didomîne. Ev civîn armanc dikin ku balê bikişînin ser tundiya li ser jinan, mekanîzmayên serlêdanê bidin nasîn û piştevaniya jinan xurt bikin.

	 

	Di çalakiya dawî de ku li Parka 500 Evlerê hat lidarxistin, Hevşaredara Şaredariya Peyasê Bêrîvan Gulşen Sîncar, alîkarên hevşaredar û endamên meclîsa şaredariyê beşdar bûn. Jinan di vê forumê de derfet dîtin ku hewcedarî, pirsgirêk, daxwaz û pêşniyarên xwe rasterast bînin ziman. Hevşaredar Bêrîvan Gulşen Sîncar diyar kir ku di meha Tebaxê de li gelek park û taxan civînên jinan pêk anîne û got: “Em ê xebatên xwe bi biryar bidomînin da ku keda jinan, hilberîna wan û îradeya wan bê dîtin, ji pirsgirêkên wan re çareserî bên dîtin û piştevaniya jinan bê kirin.”

	 

	Bi hevkariya Serokatiya Daîreya Karên Jin û Malbatan ya Şaredariya Bajarê Mezin, li Meydana Bajêr jî çalakiyek hat lidarxistin. Di vê forumê de ku Hevşaredar Bêrîvan Gulşen Sîncar û endamên meclîsa şaredariyê beşdar bûn, li dijî tundiya li ser jinan belavok hatin belavkirin û xebatên hişyariyê hatin kirin.

	 

	Foruma dawî ya kampanyayê îro li Gunda Kirxaliyê wê bê lidarxistin. Bi beşdariya Hevşaredar Bêrîvan Gulşen Sîncar, alîkarên hevşaredaran, endamên meclîsa şaredariyê û tevgera jinan, wê bi jinan re hevdîtin bê kirin. Di vê forumê de, hemû jin wê bi taybetî ji bo meşa îro û şahiyê belavok bên belavkirin û vexwendin.

	 

	Bi dirûşma "Gotina Me Neqediya ye, Em ê Tundiyê Bi Hev re Bisekinîn", meş û şahî wê îro, saet di 18:00an de dest pê bike. Ev çalakiya watedar wê li hemberî Şaredariya Sûrê pêk bê û hemû jin ji bo vê çalakiyê têne vexwendin.