Ji Sêrtê peyama 'Hûn ê fêrî rêzgirtina vîna gel bibin' 

2025-01-31 13:35:56


	 

	
		 
	
		SÊRT - Li Sêrtê li dijî tayînkirina qeyûm meşeke girseyî hat lidarxistin. Piştî meşê daxuyanî hat dayîn. Di daxuyaniyê de Serokwekîla Koma DEM Partiyê Gulistan Kiliç Koçyîgît axivî û got: "Hûn ê fêrî rêzgirtina vîn, ziman, nasname, dîrok û erdnîgariya gelê Kurd bibin."
	
		 
	
		Hevşaredarên Sêrtê Sofya Alagaş û Mehmet Kaysî ji peywirê hatin girtin û li şûna wan waliyê Sêrtê Kemal Kizilkaya weke qeyûm hate tayînkirin. Çalakiya nobetê ya li dijî tayînkirina qeyûm hatiye destpêkirin didome. Girseya ku li taxa Gapê hate gel hev, bi dirûşmên “Bijî berxwedana gelê Kurd”, “Em ê bi berxwedanê bi ser kevin” û “Jin, jiyan, azadî” ber bi pêşiya şaredariyê ve meşiya. 
	
		 
	
		Bi hezaran kes tev li meşê bûn û esnafên bajar jî bi çepik, tililî, nîşaneyên serkeftinê û dirûşman piştgirî dan meşvanan. 
	
		 
	
		Girseya ku hat pêşiya şaredariyê, li vir bi dirûşmên “Qeyûm ji Kurdistanê bicehime”, “Qeyûmê diz” û “Qeyûm dê biçe gel dê bên” bertek nîşanî tayînkirina qeyûm dan. Piştre jî girseyê dest bi nobetê kir. 
	
		 
	
		Dû re daxuyanî hat dayîn. Rêxistina DEM Partiyê yên Mêrdin, Şirnex û Êlihê, parlamenterên DEM Partiyê, aktîvîstên Tevgera Jinên Azad (TJA), MEBYA DER, TUHAYDER, Komeleya Mafên Mirovan (ÎHD) û gelek kes tevlî daxuyaniyê bû. 
	
		 
	
		Hevşaredar Sofiya Alagaş ewil axivî û diyar kir ku 3 roj in li ber Şaredariya Sêrtê berxwedana xwe didomînin û wiha got “Bila kes nefikire ku em ê wisa derkevin, ew ê li vê şaredariyê rehet rûnenên. Hewl didin karkeran ji kar derxînin, em dibihîzin ka ew çi dikin. Kesê ku bi komployê îradeya gelê Sêrtê tine bike, bila nefikire ku wê ev der ji wî re bê hiştin. Em ê çar salan hewl bidin ku kiryarên we eşkere bikin. Em ê berxwedana xwe bidomînin."
	
		 
	
		
	
		 
	
		Serokwekîla Koma DEM Partiyê Gulistan Kiliç Koçyîgît di çalakiya nobetê ya li dijî tayînkirina qeyûm li pêşiya Şaredariya Sêrtê hatiye destpêkirin de axivî û got: "Birêz Ocalan bi zelalî dibêje, ger şert û merc çêbibin, ez ê vê pirsgirêkê ji pevçûn û tundiyê derxînim ser bingehên hiqûqî. Hikûmet li hemberî peyama birêz Ocalan çi dike? Hikûmet zextên li ser hemû civakê zêde dike. Rojnamegeran dikujin, digirin, qetil dikin, şaredariya me distînin. Tu rê li ber zilmê tine, ger bi gelê Kurd re tifaqeke dîrokî ava bikî, bixwazî ??tifaqa heyî nû bikî, tu ê hînî hurmeta îrade, ziman, nasname, dîrok û erdnîgariya gelê Kurd bibî. Keştî nikare bi gotinan bimeşe, em li benda çalakiyê ne, em bang li demokrasî û hiqûqê dikin. Em we vedixwînin rêzgirtina civaka me. Êdî bes e, êdî bes e ev zilm. Me serê xwe da lê me serî netewand, me bedel da lê me serî netewand. 
	
		 
	
		Werin em sozekê bidin gelê xwe yê 7 salî heta 70 salî; Em ê we rojekê tenê nehêlin, ne tenê rojekê, em ê ji îro û pê ve jî bi heman awayî xebatên hevşaredar û partiya me bi we re mil bi mil bidin meşandin. Du hevserokên me bi me re ne, zilm me paşve nahêle, zilm têkoşîna me berfireh dike. Em ê alê dest bi dest, nifş bi nifş bihejînin. Divê gumana kesî nebe. Ev desthilatdariya faşîst wê bi berxwedana me bimeşe. Dîrok wê li ser me û gelê me binivîsîne. Ew ê jî wekî şermezariyek bêne bîranîn. Çûna wan wê bi hêrsa me û bi destê dayikên aştiyê pêk bê. Dîroka me dîroka têkoşîn, berxwedan û serhildanê ye. Ew dîrok me xurt dike. Ew ê me ber bi pêşerojeke azad ve bibe."