ENQERE - Berdevka Meclîsa Ciwanên a DEM Partiyê Edanûr Îbrahîmoglû, diyar kir ku ew ê faşîzmê paşve bixin û got, “Em ê di têkoşîna xwe ya ciwanan de bi ser bikevin, em ê tevgera xwe ya demokratîk mezin bikin. Dê dawî bi heybet be."

 

Berdevka Meclisa Ciwanan a Partiya Wekhevî û Demokrasiyê ya Gelan (DEM Partî) Edanûr Îbrahîmoglû têkildarî hilbijartinên rêveberiyên herêmî û rojevên li Navenda Giştî ya Partiyê daxuyanî da. Edanûrê ku beriya civîna meclisê axivî, wiha got: “Di hefteya ewil a meha sibatê de ji bo protestokirina komploya navneteweyî Meşa Azadiyê hate lidarxistin û bi vê yekê re gelê kurd û gelên Tirkiyeyê careke din nîşan dan ku navnîşana çareseriyê Îmrali ye, birêz Abdullah Ocalan e.” 

 

Edanûrê bi domdarî bal kişand ser pêvajoyên 8’ê Adarê Roja Jinan a Cîhanê û Newrozê û ev tişt anî ziman: “Jinan li dijî polîtîkayên şerê taybet û qirkirina jinan ên îktîdarê, li qadan dengê xwe bilind kirin. Di esasê xwe de van protestoyan nîşan dan ku polîtîkayên şerê taybet vala hatine derxistin. Coşa 8’ê Adarê û Newrozê gihiştin hev. Bi pêşengtiya hevalên me yên jin ên ciwan, coşa Newrozê veguhestin qadan û milyonan kesan Newroz pîroz klirin. Em dikarin bijêjin ji sedî 90’î wan jî ciwan bûn. Coşa Newrozê careke din nîşan da ku ciwanan ji pêşengtiya xwe, ji pêşengtiya jinên ciwan, armanc û îradeya xwe tu tiştek winda nekirine. Ev îrade û bawerî hêj didome.” 

 

Coşa 8'ê Adarê û Newrozê bandor li berxwedana Wanê kir

 

Têkildarî hilbijartinên 31’ê Adarê û pêvajoya piştre jî Edanûrê wiha got: “Coşa 8’ê Adarê û Newrozê bandora xwe li 31’ê Adarê û berxwedana Wanê kir. Îktîdara AKP-MHP’ê li Kurdistan û Tirkiyeyê têkçûneke mezin jiya. Li hemberî vê têkçûnê nezanî dê çi bike û ji ewil xwest hiqûqa xwe ya talanê li Wanê, Curnê reş, Sêwereg û Bedlîsê bidomîne. Hêj niha jî dixwaze gelek cihan bi rêya hiqûqa talanê bi dest bixe. 

 

Gel serî netewand

 

Xelkê Wanê li dijî vê bêhiqûqtiyê li ser pêya bû û nîşan da ku dê serî netewîne. Ji kêliya ewil ve daket kolanan. Ciwan û jinên ciwan ên wanî daketin kolanan û bi berxwedana xwe bi ser ketin. Hikûmeta AKP’ê xwest têkçûna xwe ji hevalê me Muhammed orhan derxîne. Wêneyê Muhammed Orhan ê ku tê de dibişiriya, nîşan da ku tu qîmeta polîtîkaya şer û çewisandinê ya AKP’ê nema ye. 

 

Ciwan li ser pêyan ne û hêj dibin hêvî. Hilbijartinên 31’ê Adarê nîşan dan ku tu wateya polîtîkayên şer ên îktîdar 8 sal in bênavber didomîne nîne. Ev yek di şexsê berxwedana Wanê de şênber bû. Krîza aborî û siyaseta şer a li tirkiyeyê bi AKP’ê da windakirin. Hilbijartinên 31’ê Adarê û berxwedana Wanê careke din nîşan da bê ka têkoşîna hevpar çiqasî girîng e. Zemîna têkoşîna yekbûyî, têkoşîna demokrasiyê ya Wanê veguhest metrepolên Tirkiyeyê û têkiliya di navbera gelê kurd û gelên Tirkiyeyê de xurtir kir. Ev 8 sal in bi polîtîkayên şer di navbera gelan de dîwaran çêbikin lê berxwedana Wanê ev dîwar qul kir. Ji bo zemîna têkoşîna hevpar a pêşerojê, em ê berpirsyartiya xwe bi cih bînin. 

 

Navnîşan Melisa Ciwanan a DEM Partiyê ye

 

Îktîdara AKP-MHP’ê di hilbijartinên gulan û adarê de xwest polîtîkayên şerê taybet bi hinek aparatan pêk bîne. Ev jî hîzbulkontra û kesên ji xwe re dibêjin neteweperestên kurd ku tu eleqeya wan bi kurdbûnê ve nîne. Yên digotin em ê bi flamayên xwe bên qada Newrozê, li wir xuya nekirin. Ev kesayetên ku aparatên şerê taybet in û eleqeya wan bi kurdbûnê re nîne, ji bilî dûrxistina ciwanan a ji siyaseta demokratîk û têkoşînê, xwedî tu armancan nînin. Lewma em bang li ciwanên jidil dikin ku tekane navnîşana wan Meclisa Ciwanan a DEM Partiyê ye. 

 

Dê xebat bidomin

 

Di hilbijartinên 31’ê Adarê de me careke din dît bê ka siyaseta şer çiqas bêbandor bûye û gelê me çiqas xwedî bawerî û xwedî îrade ye. Ji bo vê sînerjiyê veguherînin mezinkirina hêviyê û birêxistinkirina têkoşînê, em ê xebatên xwe bidomînin. Em ê di civîna xwe de li ser vê mijarê nîqaşan bikin. Em ê bi pêşniyara plansaziyekê bikevin civînê. Dê ev plansazî jî êdî bûye kevneşopiyek ku gelê me û herî zêde ciwan jê hez dikin e. Di çarçoveya kampanyaya ‘Berxwedana biheybet a li dijî şerê taybet’ de em ê li dijî şerê taybet çalakiyê li dar bixin. Ez careke din bibêjim ku em ê ji faşîzmê re bibin derd. Em ê ji faşîzmê re bibin derd û wê qels bikin. Em ê di têkoşîna xwe ya ciwanan de pir mezin bi ser kevin û tevgera xwe ya demokratîk pir mezin birêxistin bikin. Dê dawî nûwaze be.”