NAVENDA NÛÇEYAN - Kongar Star têkildarî 25’ê Mijdarê, daxuyaniyeke nivîskî weşand û got: "Em bi îradeya jinên pêşeng û hêza xwe ya parastinê li hemberî her cure şîdetê û êrişên dagirkeriyê bisekinin."

 

Meclîsa Kongra Star bi boneya 25’ê Mijdarê Roja Têkoşîna Li Dijî Tundiya Li Ser Jinê daxuyaniyek nivîskî weşand.

 

Berfirehiya daxuyaniyê wiha ye:

 

“Li hemû cihanê; taybet li çar aliyên Kurdistanê, Rojhilata Navîn û derveyî welat hemû jinan û kesayetên azadîxwaz, demokratik û gelek jinên ji her neteweyên cuda ji bo 25’ê Mijdarê Roja Têkoşîna li dijî Tundiya li ser Jinan, têkoşîn û berxwedaneke mezin û manîdar dimeşînin. Ev têkoşîn û berxwedana jinan di şoreşa Rojava de bi felsefeya “Jin, Jiyan, Azadî” ji hemû cihanê re bûye mînaka azadiyê û îlhama têkoşînê û vejîna “Şoreşa Jinan” di dilê jinan de daye çandin. Di sedsala 21’an de bi jinên azad û birêxistinkirî re ber bi “Şoreşa Jinan” ve herikandin, dê li hemberî tundiya serweriya mêran, tudiya desthilatdarî û dewletparestiyê bibe bersiva herî xurt a dîrokî. Her cure tundiya ku di her qada jiyanê de li hemberî xweza, zarok, extiyar û mirovên xizan tê meşandin jî di heman demê de li dijî jinan e, li dijî jiyanê ye û li dijî azadiyê ye. Tecrîda girankirî ya li ser Rêber Apo şîdeta herî mezin e û sûcê mirovatiyê ye. Em wek pêşengên jinên şoreşa Rojava li hemberî hemû tundiya disekinin û bi tu awayî napejirînin, ji bo wê jî em ê li her qada jiyanê xwe bi stratejiya “şerê gel ê şoreşgerî” xwe bi rêxistin bikin, têbikoşin û xwe biparêzin.

 

Li hemberî dagirkeriyê bibin yek hêz 

 

Di nava çalakiyên hemleya azadiya fizîkî ya Rêbertî de, em wek Meclisa Kongra Star a Rojava ji bo Roja Têkoşîna li dijî Tundiya li ser Jinan bi şîara “Bi felsefeya Jin, Jiyan, Azadî xwe biparêze” ketin nava çalakiyên têkoşer û berxwedêr. Bi van çalakiyan parastin û xwedîderketina jinan ji hemû cîhanê re dane xuyakirin. Em jî wek Meclisa Kongra Star a Rojava bi boneya 25’ê Mijdarê, tevî fealiyet û çalakiyên ku hatine kirin, careke din dengê xwe digihînin hemû jinan û bangewaziya xwe birêxistinkirin û têkoşînê dikin. Divê em xwe bi rêxistin bikin, tê bikoşin û li ber xwe bidin. Her wiha ji bo berfirehkirin û mezinkirina têkoşîna hevbeş, em bang li hemû jinên Rojhilata Navîn û jinên cîhanê dikin ku ji bo li hemberî dagirkerî û desthilatdariyê em xwe bikin hêz û tundiya li ser jinan bi temamî ji holê rakin, bangewaziya birêxistinkirina hevbeş dikin.

 

Ji bo avakirina jiyana demokratîk û azad

 

Hemû jinên Bakur û Rojhilatê Sûriyeyê ji 10’ Mijdarê heya 25’ê Mijdarê starta çalakî û xebatên ji bo roja 25’ê Mijdarê, dest bi pêngavekî kir, bi dirûşma “Bi felsefeya jin jiyan azadi xwe biparizê” li hemû gund û bajarên li Bakur û Rojhlatê Sûriyeyê. Di hemû çalakiyan de rol û pêşengiya xwe lîstin. Ji belavkirina belavokan heya lidarxistina meşên girseyî yên mêran, ji semîneran heya civînên taybet ên li ser tundiya jinan hatin lidarxistin. Hemû jinên şoreşa Rojava tev li hemû çalakî, kar û xebatan bûn. Bi tevlêbûna ji dil û zanebûnê, daxwaza xwe ya ji bo avakirina jiyana demokratîk û azad, careke din û bi israreke mezin ji hemû cîhanê re dan diyarkirin.

 

Berfirehkirina têkoşîna azadkirina jinan

 

Di şexsê heval Sara, heval Evîn Goyî de hemû jinên ku ji aliyê desthilatdarî û dewletê ve hatine qetilkirin, em wan bi bîr tînin û dê her daîm bibin rotaya têkoşîn û berxwedana me. Dîsa di şoreşa Rojava de di encama êrişên hewayî yên dewleta Tirk de hedefkirina jinên mîlîtan, şoreşger û xebatkar, em tu carî ji bîr nakin û tola wan li erdê nahêlin. Bi birêxistinkirina bi hezaran jinan, em ê bibin şopdarên rêya wan û têkoşînê bimeşînin. Di şexsê Hevrîn Xelef, Yûsra Derwêş, Hindê û Seîda, Zeynep Saroxan, heval Rihan, Zozan, Şînda, Zelal Efrîn de, şehadeta hemû jinên welatparêz, berxwedêr, têkoşer, şoreşger, mîlîtan û xebatkarên şoreşa Kurdistanê bi bîr tînin û di 25’ê Mijdarê de em ê bi mezinkirin û berfirehkirina têkoşîna azadkirina jinan, soza pêkanîna xeyalên wan bi dengekî bilind bigihînin hemû cîhanê.

 

Jina ku azad bibe dê civakê jî bi xwe re azad bike

 

Her jina ku azad bibe dê civakê jî bi xwe re azad bike. Guhertin û veguhertina rastiya zilaman, bi zanebûn û enerjiya jinên, têkoşer, berxwedêr û rêxistinkirî ve pêkan e. Ev yek jî wê bi xwe re “Felsefeya Hevjiyana Azad” bide avakirin. Wê cîhan bi reng û dengê jinan bê xemilandin û ahengiya xwezayê bilebitîne.

 

Li ser van esasan em Roja 25’ê Mijdarê bi çalakî, têkoşîn û parastinê ve, em her roj pêşwazî dikin û îfade dikin ku em bi îradeya jinên pêşeng û hêza xwe ya parastinê li hemberî her cure şîdetê û êrişên dagirkeriyê bisekinin. Cesaret û vîna ku me ji çalakiyên xwebexşane yên xwedawendên serdema herî dawî girtiye, hemû jinan vedixwînin bin sîwana hêza parastina cewherî ya jinan. Li hember kuştin, tecawizkirin û sîstema îdamkirina jinan em bê deng namînin. Bêtehamuliya li hemberî sîstema hevserokatiyê qebûl nakin û em ê di avakirina civaka polîtîk û exlaqî de israr bikin û di her qada jiyanê de hevbeşiya jiyanê bidin avakirin. Tam jî di vê derê de em dibêjin “Jin, Jiyan, Azadî” û ji hemû jinan re serkeftinê dixwazin.

 

Bi hêviya ku her qada jiyanê veguherînin têkoşîn û berxwedana jinan; em bi silav û hezkirinên bêdawî dibêjin Jin, Jiyan, Azadî…”