Ji bo Pervîn Buldan daxuyaniya piştevaniyê

2025-10-18 15:50:47


	 

	NAVENDA NÛÇEYAN - Platforma Jinan a Edeneyê diyar kir ku ew ê tu carî gotinên zayendperest û nijadperest ên li dijî Pervîn Buldan qebûl nekin.

	 

	Platforma Jinan a Edeneyê ji bo protestokirina gotinên zayendperest û nijadperest ên li dijî  Cîgira Serokê Meclîsê ya Partiya Wekhevî û Demokrasiyê ya Gelan (DEM Partî) Pervîn Buldan û endama Şanda Îmraliyê, li Parka Înonu daxuyanî  li dar xist. Di daxuyaniyê ku gelek jin beşdar bûn, pankartek bi nivîsa "Em nêzîkatiya zayendperest û mêrperest qebûl nakin. Pervîn Buldan ne bi tenê ye" hat vekirin.

	 

	'Êrîş sîtematîk bûne'

	 

	Sevîl Araci ya ku metna daxuyaniyê xwend diyar kir ku êrişên li dijî jin û siyasetmedarên jin bi awayekî sîstematîk tên kirin û got: "Ne faşîzm, dê têkoşîna jinan a ji bo aştiyê bi ser bikeve." Sevîl Aracci anî ziman ku jin di siyaset û her aliyê jiyanê de rastî tundiya mêran, xizanî, bêkarî û cudakariyê tên û got: "Hewldaneke sîstematîk heye ku hewl dide daxwazên jinan ên ji bo wekhevî, azadî û aştiyê bitepisîne û îradeya wan paşguh bike." 

	 

	Sevîl Araci got: "Em bi tevahî êrişên li dijî jinan, siyasetmedarên jin û têkoşîna jinan qebûl nakin. Dengê jinan wijdanê vî welatî ye." Sevîl Araciyê diyar kir ku hedefgirtina siyasetmedarên jin "rewşeke panîkê ya pergala serdestiya mêran e" û got: "Zimanê ku nijadperestî, netewperwerî û zayendperestiyê rewa dike êrişeke eşkere li ser aştiya civakî ye. Yên ku vî zimanî hildiberînin, berdewamkerên şer û dijminatiyê ne."