
Li Brîtanya şahiya Newrozê

2025-03-26 10:38:14


	&nbsp;

	&nbsp;

	&nbsp;

	NAVENDA NÛÇEYAN - Li bajarê Liverpool ê Îngilistanê û bajarê Belfast ê Bakurê Îrlandayê Newroz hate pîrozkirin. Di Newrozê de azadiya fîzîkî ya Rêberê Gelê Kurd Abdullah Ocalan hate xwestin.

	&nbsp;

	Li bajarê Liverpool ê Îngilistanê bi hezaran kes bi şîara ‘Em Rêbertî silav dikin, Aştî û Civaka Demokratîk ava dikin’ li Salona Învisible Wind Factory hatin ba hev û Newroz pîroz kirin. Şahî ji bo bîranîna şehîdên şoreşa Kurdistanê bi deqeyek rêzgirtinê destpê kir. Di sînevîzyona mezin a li ser dikê de, wêneyên Rêberê Gelê Kurd Abdullah Ocalan hatin daliqandin.

	&nbsp;

	Di şahiya Newrozê de ku gelek Kurdistanî beşdar bûbûn, Koma Dengê Botan, Mervan Şan, Berhem Şemamî û Seyda Perînçek derketin ser dikê. Kurdistaniyan bê navber dirûşmeyên “Bijî Serok Apo”, “Bê Serok jiyan nabe”, “Bijî berxwedana Tişrînê” û “Jin jiyan azadî” berz kirin.

	&nbsp;

	Di Newroza Liverpool’ê de tilîliyên jinên Kurd deng veda. Koma folklorê ya bi navê Koma Teşî ya girêdayî Meclîsa Gelê Kurd derket ser dikê.

	&nbsp;

	Li ser navê Tevgera Ciwanên Şoreşger (TCŞ) Agît Sûrûç, Hevserokê Meclîsa Gelê Kurd a Îngilistanê Saît Pirsus û li ser navê Piştevaniya Enternasyonalîst Peyama Ronî û siyasetmetdarê Kurd Osman Baydemîr axivîn.

	&nbsp;

	Newroza Liverpool’ê di tevahiya şevê de dewam kir. Bi hezaran Kurdistaniyan bi dirûşmeya “Bijî Serok Apo” şahiya Newrozê temam kirin.

	&nbsp;

	Li paytexta Bakurê Îrlandayê Belfast’ê Komuna Civaka Kurd bi şîara ‘Em Rêbertî silav dikin, Aştî û Civaka Demokratîk ava dikin’ şahiya Newrozê lidar xist. Bi sedan kes beşdarî şahiyê bûn. Piştî salên dirêj Newroz li Belfast St. Congall’s Divis Street hate pîrozkirin. Kurdistanî û dostên wan eleqeyek zêde nîşanî şahiyê dan. Siyasetmetdarê Kurd Osman Baydemîr jî weke axaftvan beşdar bû. Siyasetmedarên Îrlandayî û sendîkavan jî li şahiya Newrozê bûn.

	&nbsp;

	Komuna Civaka Kurd a Belfast axaftina vekirinê kir. Banga Rêberê Gelê Kurd ya Aştî û Civaka Demokratîk hate silavkirin û hate diyarkirin ku bi ruhê Newroza îsal wê teqez azadiya fîzîkî ya Rêber Apo pêk were.

	&nbsp;

	Piştî axaftina vekirinê hunermend Seyda Perînçek û komên muzîka herêmî, derketin ser dikê. Siyasetmedarê Kurd Osman Baydemîr di şahiyê de axivî û ji Şêx Seîdan heya Seyîd Rizayan, ji Mazlum Doganan heta Sakîne Cansizan, têkoşîna gelê Kurd bi bîr anî.

	&nbsp;