Li Osloyê ji bo Abdullah Ocalan çalakî

2024-11-03 17:49:02


	 

	 

	 

	NAVENDA NÛÇEYAN-Li paytexta Oslo ya Norveçê ji bo piştevaniya Kurdistanê û azadiya Abdullah Ocalan li qada stasyona trenê ya li navenda bajêr, konser hate lidarxistin.

	 

	Federasyona Komeleyên Kurd a Norveçê (NCDK-OSLO) konser lidar xist. Gelek partiyên siyasî, rêxistinên civakî yên sivîl û sendîkayan piştgirî dan konserê.

	 

	Çalakî bi deqeyek rêzgirtinê destpê kir. Li ser navê NCDK-OSLO û Komîteya Amadekar Serhildan Reşko axivî. Serhildan  bal kişand ser pêngava ji Abdullah Ocalan re azadî û diyar kir ku divê têkoşîn bê mezinkirin. Serildan bêdengiya civaka navneteweyî ya li hemberî êrîşên Tirkiyeyê  jî şermezar kir û Roja Kobanê ya Cîhanê silav kir.

	 

	Nûnerê Tevgera Azad a Ewropayê Omer Amîn jî qala êrîşên Tirkiyeyê yên li ser Kurdistanê kir û PDK şermezar kir. Omer Amîn bal kişand ser girîngiya Pêngava Azadiyê ya Kûreyî ya ku ji bo azadiya Abdullah Ocalan tê meşandin.

	 

	Ji serokatiya sendîkaya Oslo LO ku sendîkaya herî mezin a Norveçê ye, Ingunn Gjerstad axaftinek kir û wiha got, “Her sal Kurdistanî û dostên wan ji bo azadiya Abdullah Ocalan di çalakiyan de bi me re ne. Em weke Oslo LO dibêjin ku êdî ji bo aştî û diyalogê azadiya Birêz Abdullah Ocalan şert e. Abdullah Ocalan 26 sal in di bin tecrîdê de bi rengekî bêhiqûqî û di hucreya yekkesî de tê ragirtin, ev yek nayê qebûlkirin.”

	 

	Di çalakiyê de dirûşmeyên “Ji Rêber Apo re azadî, ji Kurdistanê re aştî” û “Jin Jiyan Azadî” hatin berzkirin.

	 

	Çalakî piştre bi konserê dewam kir. Komê muzîkê ya Norveçî Knut Reiersrud & Marit Halvorsen, ji Amerîkaya Latin Xavier Valverde û hunermendên Kurd Welat Kobanê ve Nejman Sindî derketin ser dikê.