NAVENDA NÛÇEYAN - Kongreya Ciwanên Rojhilata Navîn û Bakurê Afrîkayê bi beşdariya 21 rêxistinên ciwanan li Beyrûtê dest pê kir.

 

Kongreya Ciwanên Rojhilata Navîn û Bakurê Afrîkayê bi beşdariya 21 rêxistinên ciwanan li paytexta Lubnanê Beyrûtê dest pê kir. Kongre bi dirûşma "Ciwan û avakirina siberojeke azad" tê lidarxistin. Di kongreyê de pirsgirêkên ciwanan, rêbazên çareseriyê, şerê li dijî nîjadperestiyê, pirsgirêkên azadiya jinan, çawaniya aktîfkirina rola ciwanan, pêşxistina hevgirtin û têkoşîn ciwanan dê werin nîqaşkirin.

 

Sazî û rêxistinên ciwanan ên ku beşdarî kongreyê bûne ev in: Yekitiya Ciwanên Demokrat a Iraqê, Beşa Xwendekaran a Partiya Sosyalîst a Yemenê, Yekitiya Ciwanên Pêşverû yên Suryan, çalakvanên ji Sehraya Rojava, Tevgera Siberoja Ciwanên Morîtanyayê, Yekitiya Ciwanên Pêşverû yên Misirê, Yekitiya Jinên Ciwan, Ciwanên Meclisa Civakî ya Ermenî, Meclisa Ciwanên Sûriyeya Demokratîk, Saziya Nebra Tîm Koş a Çand, Kevneşopî û Xêrxwaziyê, Ciwanên Yekitiya Beth Nehrên a Nîştimanî, Rêxistina Ciwanên Kurdistanê, Ciwanên Tevgera Çepgir a Şoreşger a Sûriyeyê, Rêxistina Ronesans a Xwendekar û Ciwanên Kurdistanê, Ciwanên Tevger Bedîl a Misirê, Ciwanên Partiya Komunîst a Kurdistanê, Yekitiya Ciwanên Kurdistanê, Meclisa Ciwanan a Kongreya Demokratîk a Gelan, Rêxistina Azadiya Ciwanên Kurdistanê, Kombûna Nivîskar û Çalakvanên Yemenê û Komeleya Alîkariêyn Mirovî ya ji bo Jin û Zarokan a Efganistê.

 

Kongre dê 2 rojan dewam bike. Di roja yekemîn de dê bandora modernîteya kapîtalîst li ser ciwanan, têkoşîn û ezmûnên xweseriya ciwanan, qirkirina xweza û jîngehê û rewşa jinên ciwan û azadiya jinan werin nîqaşkirin. Di roja duyemîn de jî dê der barê pirsgirêkên ciwanan, rola ciwanan di pêşxistina çanda jiyana hevbeş û rêbazên pêşxistina hevgirtin û têkiliyên ciwanan de atolye werin lidarxistin.