Rêxistina Mafên Mirovan daxwaza girtina Girtîgeha Qerçekê kir  

2025-09-26 13:07:22


	 

	NAVENDA NÛÇEYAN - Rêxistina Mafên Mirovan a Îranê daxwaza lêpirsînekê li ser mirina girtiyên siyasî yên ku li Girtîgeha Qerçekê jiyana xwe ji dest dane kir û diyar kir ku divê ew girtîgeh were girtin.

	 

	Rêxistina Mafên Mirovan a Îranê derbarê Somaye Raşîdî û Cemîla Ezîzî de, ku di dema ragirtina wan a li Girtîgeha Qerçekê de pirsgirêkên wan ên tenduristiyê nehatine paşguhkirin û li Nexweşxaneya Varamîn Mofatteh mirine, daxuyaniyek weşand. Rêxistinê tekez kir ku her du girtiyan ji ber bêberpirsiyariyê jiyana xwe ji dest dane.  

	 

	Di daxuyaniyê de hatiye diyarkirin ku hewlên veguhestina herdu girtiyan, tevî Somaye Rashidi, bo nexweşxaneyê piştî ku rewşa wê xirabtir bû û ew ket komayê, bêserkeftin bûn. Di daxuyaniya ku ji hêla Rêveberê Rêxistina Mafên Mirovan a Îranê Mehmûd Amiry-Moghaddam ve hatiye îmzekirin de wiha tê gotin: "Divê komîteyek serbixwe ya lêkolîna rastiyan tavilê sedemên mirina van herdu girtiyan lêkolîn bike. Desteya Zindanên Îranê, Serokê Dadweriyê û di dawiyê de rêberê Komara Îslamî ya Îranê ji jiyana van girtiyan berpirsiyar in û divê werin hesabpirsîn."  

	 

	Di daxuyaniyê de Girtîgeha Qerçekê wekî "sembola înkarkirina eşkere ya rûmeta mirovan" hate binavkirin û hate gotin, "Divê civaka navneteweyî êdî li hember van binpêkirinên mafên mirovan ên berbelav bêdeng nemîne." Rêxistina Mafên Mirovan a Îranê careke din bang li civaka navneteweyî, saziyên mafên mirovan û hemî kesên xwedî wijdan kir ku ji bo girtina Girtîgeha Qerçekê tedbîran bigirin.  

	 

	Li gorî Rêxistina Mafên Mirovan a Îranê, şert û mercên girtîgehan, bi taybetî ji bo jin û dayikan, pir nemirovane ne. Zindana Qerçekê berê avahiyek bû ku wekî çewlika mirîşkan dihat bikaranîn. Îro, ew veguheriye girtîgehek ji bo jinan, tevî girtiyên siyasî. Dayikên ku li vir zarok tînin dinyayê, pir caran neçar dimînin ku dema zarokên wan digihîjin du saliya xwe, dev ji wan berdin û nikarin çarenûsa wan bişopînin.