AMED - Konferansê 3ine yê DBPyî de Hemsereka Pêroyî Çîgdem Kiliçgun Ûçar, dîyar kerd ke aktoro sereyîn yê çareserî Abdullah Ocalan o. Hemserekê Pêroyî Keskîn Bayindirî zî vat: "Ewro roj roja tifaq û yewîya şarê kurdî ya. Ganî ma hemverê zaliman destkewtişê xo bipawê.”

 

Partîya Herêmanê Demokratîke, verê Kongreya xo ya 7ine yê 12ê Çileya 2025î de biviraza, bi şîarê “Bi rayberîya îradeyanê pratîk û teorîkî, komelo azade înşa kenê” konferansê pêroyî  virazena. Konferans Banê Rêxistinê DBPyî yê Amedî virazîyeno û konferansî ra Hemserekanê DBPî Çîgdem Kiliçgun Uçar û Keskîn Bayindir, Hemserekê DTKyî Berdan Ozturk, Hemserek Tuncer Bakirhan, hemserekanê şaredarîye, temsîlkaranê partî û sazîyê sivilî beşdar benê.

 

Hemserekên Pêroyî yê DBPyî Keskîn Bayindir û Çîgdem Kiliçgun Ûçar qiseykerdişê destpêkê konferansî kerdî.

‘Pawitişê Rojawanî, pawitişê deskewtişê kurdan o’

 

Vernê de Hemserekê Pêroyî yê DBPyî Keskîn Bayindirî qisey kerd. Keskîn Bayindirî bal ant ser hêrişê Surîyeya Rojhelat û Vakurî û wina vat: “Ganî nê hêrişan ma seyr nêkerê, ma do heme waran de seba pawitişê destkewteyê xo bixebitîyê. Şarê kurdî destkewteyê xo pawit, ewro pawitişê Rojawanî pawitişê destkewtişê kurdan o. Kurdistan de munaqeşeyî ser meseleya kurdî ra bawerîya şarî çin a. Tirkîya û hêzê mîyanêneteweyî wazenê statuyê Rojawanî çin bikerê, no ser do ça beno wa bibo ma semedê pawitişê destkewtişê xo bixebitîyê. Ganî statuyê Surîyeya Rojhelat û Vakûrî bêro şinasnayîş.”

 

‘Ma têkoşînê şarê xo ra bawer kenê’

 

Keskîn Bayindirî ard vîr ke hêrişê 2014î de kurdan destkewtişê xo pawit o û serkewte bîyê û wina domna: “2014 de şarê kurdî, bi hêzê yewî û hîşyarîye, destkewtişê xo pawit û ameyî nê rojan. A roje ancî ameye, roj roja pawitişê yewîye ya. Ma têkoşînê xo û şarê xo ra bawer kenê.”

 

‘Bingeyê Rojawanî hêzdar o’

 

Hemsereka Pêroyî ya DBPyî Çîgdem Kiliçgun Uçar zî vat ke Rojhelatê Mêyanên de qirkerdişî pê yenê û wina vat: “Şerê Hîrêne yê Dinya de her kes wazeno sînoranê xo xêz bikero la muhîm paradîgma ya. Rojawan zî bi paradîgmaya birêz Ocalanî ameya awankerdiş û bingeyê ci hêzdar o.” 

 

‘Wa konferansê ma bibo wesîleya azadîye’

 

Çîgdem Kiliçgun Ûçar dîyar kerd ke Tirkîya heta nika meseleya kurdî çareser nêkerda û vat: “Meseleya kurdî, meseleya sereyîn ya Tirkîya ya. Ma venga her kesî kenê ke bêrê rayîrê xeta hêrîne sîyasetî ser û xebate bikerê. Êdî meseleya kurdî zere ra nîna safîkerdiş. Aktorê sereyîn yê çareserî rêzdar Ocalan o. Ma semedê her tewir xebate û têkoşînî amade yê. Ma hêvî kenê ke konferansê ma bibo wesîleya azadîya cinî, şarê kurdî û azadîya birêz Ocalanî.”

 

Badê qiseykerdişî, konferans çapemenîye rê padeye dewam kerd.