‘Çi destê ma ra bêro ma do semedê Îmraliyî bikerê’

2024-12-05 11:10:42


	 

	Rozerîn Gultekîn

	 

	STENBOL - Parlamentera Tifaqê Keskî ya Çepê Îtalyayî Francesca Ghrîrra û îdarekara Koma Paştîdayîşê Kurdî ya Partîya Sûre ya Norveçî Anne Kulseng Berg ke waştişê Abdullah Ocalanî dir pêvînayîş bikerê, muracatê Wezaretê Edaletî kerdî û dîyar kerdî ke rolê Abdullah Ocalanî çareserîya meseleya kurdî de xeylêk muhîm o û mesajê; semedê Abdullah Ocalanî çi hewce bikero do bikerê, dayî.

	 

	Hemverê tecrîdê giran yê Rayberê PKKyî Abdullah Ocalanî ser o her wareyî de têkoşîn dewam keno. Nê xebatan ra yewe zî heyetêk mîyanneteweyî yê parlamenter, rojnameger û temsîlkaranê partîyanê sîyasîyan ra pê yena, ya. Heyet, semedê pêvînayîşê Abdullah Ocalanî muracatê Wezaretê Edaletî kerd.

	 

	‘Semedê azadîya birêz Ocalanî ma do her çî bikerê’

	

	Parlamentera Tifaqê Keskî ya Çepî ya Îtalyayî Francesca Ghrîrra dîyar kerd ke semedê çareserîya meselaya kurdî, rayîrê aştî muhîm o û vat: “Ma hêvî kenê ke birêz Ocalan lezkî azad bibo. Tecrîdkerdişê birêz Ocalanî hetê merdimayî de çîyêk xof o. Pêwa ke no tecrîd biserran o dewam keno, hema semedê aştîye û çareserîya meseleya kurdî nuseno û fikrîyeno. Hêvîdar a netîceya nê de çareserîya meselaya kurdî bibo. Bi raştî ez fam nêkena ke birêz Ocalan çira bi serran o binê tecrîdî de yo. Semedê fikrê xo uca de yo. Rewşa zîndananê Îtalyayî zî baş nîya. Heqê merdiman uca de zî çin o. La rewşa birêz Ocalanî zaf cîya ya û nimûneyêk winasî çin o. Hêvîdar a Îtalya semedê peynîbîyayîşê dejê şarê kurdî bibo hetkar. Heqê her kesî est o ke bi aştîyane biciwîyo. Semedê azadîya Abdullah Ocalanî, semedê peynîbîyayîşê tecrîdî çi ji destê ma ra bêro ma do bikerê.”

	 

	‘Abdullah Ocalan wayîrê hêzo ke xeylêk kesî bîyaro têhet o’

	 

	Îdarekara Koma Paştîdayîşê Kurdî ya Partîya Sûre ya Norveçî û têgêrayîşê femînîste ya Norveçî Anne Kulseng Berg zî vat, Norveç de bi xeylêk rêxistinê cinîyanê kurdan dir xebatan kenê û semedo ke çîyê ke Tirkîya de qewimyenê bivînê ameyê tîya. Anne Kulseng Berg wina vat: “Tecrîd pîl o û sey problemêk pîl vernîya ma de yo. Tecrîdkerdişê birêz Ocalanî famkerdiş, goreyê mi xeylêk muhîm o. Qaso ke ma vînenê, semedê kurdanê Tirkîya, Sûrîye û Îranî tecrîd problemêk pîl o. Abdullah Ocalan wayîrê hêzêk ke xeylêk merdiman bîyaro têhet o. Badê ke ez agêrî û çîyo ke vernê de bikerî, ganî na babete de baroyê Norveçî dir hemkarî bikerî. Tecrîdî munaqeşeyî rê abikerê.”

	 

	Jîneolojî îdeolojîyêke xurt a 

	 

	Anne Kulseng Berg wina qedêna: “Mi paradîgmaya Abdullah Ocalanî reya ewilî konferansêk Osloyî de eşnawit. Jîneolojî tesîrêk pîl mi ser o kerd. Na îdeolojîyêke xeylêk xurt bî. Femînîzmî dir xeylêk noktayê ci yê hempar estbî. Awankerdişê akademîyan û averşîyayîşê ci xeylêk muhîm bî. Swîsre, Stockholm de akademîyêke est a. Nê zana. Goreyê mi ganî yew Norveç de zî abibo. Jîneolojî îdeolojiyêke xurt a. Semedê nê serdayîşî zî xeylêk keyfweş a.”