Derya Ren

 

RIHA - Endama Înîsîyatîfê ‘Abdullah Ocalan rê Azadî’ Eyşe Efendî dîyar kerd ke ganî şarê kurdî hemverê hêrişê Rojawanî ser o vejîyê wareyan û wina va: “2014ine de senîn ke ma destûr nêda Kobanê bikewo ma ewro zî şima ra nê pawenê.”

 

Hêrişê HTŞ, DAIŞ û çeteyê girêdayeyê Tirkîya yê hemverê Rojawanî dewam kenê û sere de hêzê HSD-YPJ’yî heme şarê Rojawanî tewrê seferberî bîyî. Endama Înîsîyatîfê ‘Abdullah Ocalan rê Azadî’ Eyşe Efendî ke 2014ine de hemverê hêrişê Kobanê ser o xo ver da, derheqê hêrişê Rojawanî de qisey kerd.

 

‘Kobanê nêkewt û do nêkewo’

 

Eyşe Efendî xoverdayîşo ke 2014-2015ine de hemverê hêrişê Kobanê ser o ame dayîş ard vîr û wina va: “Ma o dem komployê mîyanneteweyî dir rî bi rî bî. Komployo ke serokî ser o 2014-2015ine de ame domnayene hema zî dewam keno. Nê ser o ma bi ruhê neteweyî ke sînor de dayî vaznayîş têgêrayî. Sere de ciwanê kurdî, heme kurdî sînor de vaznayî û resayî Kobanê. Hemî dinya wazena Kobanê çin bikero. Wazena kurdan orte ra wedarno. O dem zî Tirkîya pey hêrişan de bî. O dem bi hezaran kurdî koçber bîyî, bi hezaran ameyî qetilkerdiş. Qirkerdişêk gird ame ciwîyayene. O dem Erdogan her tim vatêne ‘Do Kobanê bikewo’. Labelê ma vîna ke Kobanê nêkewt û do nêkewo.”

 

‘Ruhê seferberî nêverda Kobanê bikewo’

 

Eyşe Efendî dîyar kerd ke ruhê Kobanê hema gane yo û va Kobanê de cuyayîşêke est o û va: “Kobanê Rojawanî lingan ser o verda. Kobanê hetê sîyasî, cografya û dîplomasî de xurt o. Nê hetî de kurdî bîyî yew û komployê Kobanê ser o veng vetî. Senîn ke komployê  serekî ser o veng ame vetiş, bi xoverdayîşî komployê Rojawanî û Kobanê ser o zî veng ame vetiş. Ruhê yewîya Neteweyî her çar parçeyê Kurdistanî de vejîya orte. Bi ruhê yewîya neteweyî pêşmerge zî bi çekê xo resayî Kobanê. Şarê kurdî bîyî yew. Nêverdayî Kobanê bikewo. Şarê Kobanê hema lingan ser o.”

 

Kobanê binê ablûqa de yo

 

Eyşe Efendî ard ziwan ke ê hema serê serra 2026ine de yê aştîye ra bi hêvî yê û wina bale ant venga ‘Aştî û cimatê demokratîkî’ yê Rayberê Şarê Kurdî Abdullah Ocalanî dayo destpêkerdişî ser. Eyşe Efendî wina ard ziwan: “Pêwa prosesî hêrişê Rojawanî kerdî. DAIŞ ke merdiman qetil keno, sere birneno gane kerdî. Dewleta tirke mîyanê nê de ya. Hêrişê hemverê Rojawanî ancî kerdî dewre. Serrgêra xelaskerdişê Kobanê de ancî hêriş kerdî. Na rewşe yena a mana ke heme Rojawan binê îşxalkerdişî de yo. Senîn 2014ine de qirkerdiş bica ardî, nika zî kenê. Tutî serdan ra dinyaya xo bedelnenê. Awe, ceyran, sotemenî û heme lazimî birnayê. Kobanê binê îşxalkerdişî de yo.”

 

‘Wa Şarê Kurdistanî wayîrê Rojawanî vejîyê’

 

Eyşe Efendî yewîya neteweyî ya kurdan a 2014ine de ameya awankerdiş ard vîr û wina peynî ard: “Ê demî ra heta nika yewîya kurdan pê amî. Ez reyke bîn venga şarê Bakur kena; ma senîn 2014ine de destûr nêda Kobanê bikewo ma ewro zî eynî çî pawenê. Ez şahidê ê demî ya. Ciwanê kurdî sînor de vazdayî û resayî Kobanê. Sînorê orteyî ameyî wedarnayîş. Ma semedê her kesî sipas kena. Dinya hemverê hêzê kurdan de matmayî ya. Ma aştî û azadîye wazenê. Ma nêwazenê dayîkî hêsiran bivarnê. Xoverdayîş cuyayîş o.”