ŞIRNEX - Berîvanê ke zozananê Marinosî yê Şirnexî de yê dîyar kerdî ke ganî Rayberê Şarê Kurdî Abdullah Ocalan azad bibo û qetî kerd ke tena bi nê samîmîyetê prosesî do bêro famkerdiş.

 

Proseso ke dimayê vengdayîşê Rayberê Şarê Kurdî Abdullah Ocalanî yê "Aştî û Komelê Demokratîkî" yê 27ê Sibate de dest pêkerd, hetê pêro beşê komelî ra bi pozîtîf ame pêşwazîkerdiş. Berîvanê ke qezaya Elkê ya Şirnexî û herêma koyê Morinosî yê Colemêrgî de ciwîyenê, fikrê xo yê prosesî ser o pare kerdî.

 

Bêrivanan dimayê vengdayîşê Rayberê Şarê Kurdî Abdullah Ocalanî hêviya xo ardî ziwan.

 

'Êdî bes o'

 

Aysele ke dîyar kerd ke sey kurdêke aye xeylêk probleman dir rî bi rî ya û va: "Ganî nê problemî peynî bibê. Ma zaf bermayî, ma zaf va, ma bîyî rincan û ma vanê êdî bes o. Ma nêwazenê dayîkî bibermê. Ma zaf zulm ant. Ma yewîye û pêgirewtiş wazenê. Wexto ke ez şina nêweşxane yan zî cayêk bîn, ez nêwazena ke ê bi hawayêko qestî mi ra vajê, 'Ma na kurd a?' Ma nêwazenê ke ê binê alaya xo de  ma peygoş bikerê. Ê ma kêmî vînenê, çira wina yo? Ez nêwazena her di hetan de zî hêsrî bivarê.”

 

'Ma wazenê serekê ma serbest bêro veradayîş'

 

Dîlan Olaş zî bale ant serê têduştî û va: "Ma wazenê serekê ma û tepişteyê bînî zîndan ra serbest bêrê veradayîş. Ma nêwazenê dayîkê ma hêsirê xo birijnê. Ma wazenê bi azadî biciwîyê. Zozanê ma weşik ê, la ma xo rehet hîs nêkenê semedo ke binê zozanê ma de qereqolêk ame viraştiş. Ma tîya cuyêka asan wazenê û ma wazenê no qereqol bêro wedaritiş."

 

'Ma wazenê mîyanê aştî û aramî de biciwîyê'

 

Sabriye Ataman semedê proseso ke dimayê vengdayîşê Rayberê Şarê Kurdî Abdullah Ocalanî yê semedê " Aştî û Komelê Demokratîkî" ke 27ê Sibate de dest pêkerd, hêvîya xo ard ziwan. Sabrîye Ataman va, "Bi hêvî ya ke proses hîna baş bibo. Ma mîyanê aştî û aramî de biciwîyê. Wexto ke proses başêr bibo, ma wazenê ke qereqolê nêzdîyê zozanan bêrê wedaritiş."