Nazlican Nûjîn Yildiz

 

ÎZMÎR - Paştdayîşê semedê vengdayîşê Rayberê Şarê Kurdî Abdullah Ocalanî yê ‘Aştî û komelê demokratîk’ her ke şino pîlêr beno. Cinîyê Aştîye yê Foçayî diyar kerdî ke no vengdayîş zaf bierc o û wina vatî: “Na babete de çi bikewo milê ma ser, ma amadeyê ke ca bîyarê.”

 

Rayberê Şarê Kurdî Abdullah Ocalanî 27ê Sibate de heyetê Îmraliyî yê Partîya Têduştî û Demokrasî (DEM Partî) dir pêvînayîş kerd û mesajê ‘aştî û komelê demokratîk’ neql kerd. Badê deklerekerdişê mesajî, her cayî ra paştdayîş ame û her ke şino pîlêr beno.

 

Cinîyê Aştîye yê Foçayî derheqê vengdayîşê seserre de qisey kerdî û bale antî muhîmîyê vengdayîşî ser o û vatî, hêvî newe ra zergûn bîya. Cinîyan sewbîna dîyar kerd ke semedê aştî pê bêro do têkoşîn bikerê û vatî, ganî her kes destê aştîye derg bikero.

 

‘Hêvîyêke zergûn bî’

 

Remzîye Baltaş da zanayîş ke sey dayîkêke veng dana ke pêro cinî paştdayîş bidê û wina vat: “Nê welatî de zaf gonî rijîya, dayîkî bermayî. Dejî ameyî ciwîyayîş. Ma do aştîye dir keyf û aram bê. Ma Cinîyê Aştiye yê Foçayî rojan ke awan kerdê, ma aştîye wazenê. Ganî se beno wa bibo her kes veng bido nê vengdayîşî. Ganî ma destê aştîye bigîrê. Ez semedê tornanê xo dinyayêke bêşer wazena.”

 

‘Vengdayîş zaf muhîm o’

 

Ozgul Turunçoglu dîyar kerd vengdayîş zaf bierc o û vat, ganî her kes paştdayîş bido. Ozgul Turunçoglu wina ard ziwan: “Ez mamosteya teqawît a û dayîk a. Ez çi biwazî? Ma aştîye wazenê. La ganî ma bawer bikerê. Ma hêvîya xo vînî nêkerê. Aştî nêzdî ya. Ganî ma destê xo bidê yewbînan. Sewbîna rayîr çin o. No welat aştîye heq keno. Nê semedî ra ganî her kes berpirsyarîyê xo ca bîyaro.”

 

‘Proses pir bierc o’

 

Guzîn Tumer zî vat, proses zaf bierc o û wina dewam kerd: “Badê qirkerdişê Pirsûsî ma sey komêke cinî Foça de xo rêxistin kerd. Amancê ma şîdet bêro vindarnayîş. Ma prosesê aştî xeylêk bierc û muhîm vînenê. Ma wazenê ke netîceyê baş bêrê bidestkerdiş. Şer biserran o cuya tutan û cinîyan qedênayo. Ma cinî ganî paştdayîş bidê prosesî. Ma do hevalanê xo yê kurdan dir bêrê têhet û bernameyan viraznê. Ez proses zaf bierc vînena.”