Neslîhan Kardaş

 

QERS - Sevda Yildiz ke prosesê pandemî de agêra dewa xo, pêwa kar û barê pesdewarî û ramitişî, siyasetî de zî aktîf ca gêna.

 

2020ine de semedê vîrusê Covîd-19 ke tesîr pêro dinya ser o kerd, Sevda Yildiz û keyeyê xo Stenbolî ra yenê dewa xo Qewekomî ya Qaxizmanê Qersî ser o ya. Sevda Yildiz senî yena dewe mêsanê hêngimînan gêna û 10 mêşinan gêna. Sevda Yildiz 5 serrî yo bi tena sereyê xo têkoşînêk pîl dana û pesdewarî kena. Nika 70-75 pesê aye est ê. Bi şitî dir pes, sebze û fêkîyê baxçeyê xo debara xo kena.

 

Sîyaset de ca gêna

 

Sevda Yildiz eynî wextî de hemsereka DEM Partî ya Qaxizmanî ya zî. Sevda Yildiz ajansê ma rê derheqê proseso ke pandemî de ciwîyaya û xebatê partîye de qisey kerd.

 

10 mêşinan ra nika nêzdîyê 80 hebî est ê

 

Sevda Yildiz dîyar kerd ke serra 2019ine de semedê pandemî Stenbol ra ameyê dewa xo û reyke bîn anêgerayê. Sevda Yildiz dîyar kerd ke vernê de tay mêsanê hêngimînan gêna û vat: “Nê mêsî semedê mi tay bî. Merdimêk mi pes girewtêne. Vat, bê ti zî bigî. Mi 10 hebî, ey zî 40 hebî girewtî. Hîrê serrî yo ez tena pesdewarî kena. Mi bi 10 heban dest pêkerd, nika 70-75 mêşinê mi est ê.”

 

‘Hemserekî kena’

 

Sevda Yildiz dîyar kerd ke hamnanî pesê xo şirawena zozanan û pesê xo kena mîyanê pesê ke şiwanê înan est ê. Sevda Yildiz wina vat: “Pêwa nê ez baxçe dir eleqedar bena. Sebze û fêkîyê xo baxçe ra gêna. Ez berardişî ra hes kena. Ez eynî wextî de hemserekîya DEM Partî ya Qaxizmanî zî kena. Ez karê xo ra hes kena. Zehmet o la wexto ke heywananê xo dir eleqedar bena keyfweş bena. Hem hetê zehmetî hem zî yê weşî est ê.”

 

‘Berardiş mi keyfweş keno’

 

Sevda Yildiz tewr peyîn dîyar kerd ke ganî pêro cinî berardeyî bikerê û vat, ez nê çî pêro hevalanê xo ra vana û wina qedêna: “Berardiş mi keyfweş keno. Ez bi qezencê xo hewl dana ke keyeyê tepişteyan rê bibî hetkar. Wexto ke bi qezencê xo çîyêk kena, keyfweş bena. Cinî wexto ke biwazê, eşkenê her hetî ra cuye weş bikerê.”