AMED - Dayîkê Aştîye badê mesajê nuşteyî yê Rayberê Şarê Kurdî Abdullah Ocalanî de qisey kerdî û dîyar kerdî ke ê prosesî ra bi hêvî yê û vatî, "Ganî her kes semedê aştîye têkoşîn bikero û bi berpirsyarî wurzo. Ganî her di hetî zî beşdarê têkoşînî bibê."

 

Heyetê Îmraliyî yê Partîya Têduştî û Demokrasî (DEM) mesajê seserre yê Rayberê Şarê Kurdî Abdullah Ocalanî yê Stenbolî wend. Mesaj bi hawayêk hemwext Kurdistan, Tirkîya û Ewropa de bi hawayêk gane ame goşdarîkerdiş. Mesajo ke xeylêk herêman de bi baldarîyêk pîl ame goşdarîkerdiş, bi bingehê prosesê newe yê aştîye.

 

Endamê Meclîsê Dayîkê Aştîye yê Amedî derheqê prosesî de fikrê xo ardî ziwan.

 

'Ma wayê û bira yê, dişmin nîyê’

 

Dayîka Aştîye Şadiye Ayma: Mesajo ke Abdullah Ocalanî şirawito xelêk muhîm o. Aştîyêke bi rûmet tena semedê ma kurdan nê, semedê her kesî do baş bibo. Wa êdî qetlîamî nêvirazîyê, wa êdî ne kurdî û ne zî tirkî zirar bivînê. Her çiqas kurdî her tim dejenê zî, yê ke vernê de destê aştîye derg kenê yê. Wa berdêlê nê çî bidê û wa dayikê tirkî zî xo biresnê kurdan. Wa Tirkîya de aştî û aramî bibo, ma bira yê, dişmin nîyê. Rayberê ma semedê aştîye çî başî vat, wa aştîye bica bîyarê.

 

'Ma prosesî ra bi hêvî yê'

 

Kıymet Şoretoğlu: Ma aştî û têduştî wazenê. Ma êdî nêwazenê dayîkî hêsiran bivarnê. Nika ma wazenê nameyê aştîye ser o çîyêk baş virazîyo. Ma nê prosesî ra bi hêvî yê, la bawerîya ma bi hukmatî nêmenda. Ez hêvî kena ke çîyêk baş bibo û ma do nika keyfweş bibê. 

 

‘Ganî her di hetî zî têkoşînê aştîye de ca bigîrê’

 

Rahîme Çelîk: Seke bi serran o her kes zano dayîkî aştîye wazenê. Ganî êdî kes nêmiro, tutê ma rehetî de wa biciwîyê. Wa êdî ma azad bibê, wa tutê ma nêmirê. Ma aştîye wazenê. Ganî her kes semedê aştîye têkoşîn bikero û wezîfeyê xo bica bîyaro. Ganî her di hetî zî beşdarê têkoşînî bibê.

 

'Ma wazenê mîyanê aştîye de biciwîyê’

 

Havva Kıran: Ma sey Dayîkê Aştîye paştdayîş danê akerdişê na masa. Semedê çî çi lazim bo, ma hadre yê. Ma wina fikrîyenê ke adirbest do yewhetî nêbo. Bêrê ma yewbînan bi vilikan ko bikerê, vera ke her di hetî tabûtan ko bikerê. Bêrê ma bi dayîkê polîs û leşkeran yewbînan ko bikerê. No welat welatê her kesî yo, her kes eşkeno tîya biciwîyo. Semedê na herre her kesî bedel dayo, her kes eşkeno tîya biciwîyo. Ma zî şarê nê welatî yê û ma wazenê tîya bi aramî biciwîyê.