STENBOL - Endama Komeleya Demê Cinî, bi sloganê “Ma yenê bi azadîya cinî, wext dorpêç bikerê” 8ê Adare pêşwazî kenê û dîyar kerdî ke ê do wareyan de bê û têkoşînê cinîyan ê ke serkêşî kerdê bikerê xo verike.

 

Komeleya Demê Cinî, bi sloganê “Ma yenê bi azadîya cinî, wext dorpêç bikerê” 8ê Adare pêşwazî kenê û lezî dayî xebatanê xo. Cinîyan vengdayîşê têkoşînê hempar kerdî.

 

'Ma bi xo bawer ê'

 

Sereka Komeleya Demê Cinî Dîlek Başalan, dîyar kerd ke bi ruhê azadîye ve ber bi 8ê Adare şinê û wina dest bi qiseykerdişê xo kerd: "Ma çalakîyê 8ê Adare bi sloganê 'Ma yenê bi azadîya cinî wext dorpêç kenê' pêşwazî kenê. Ma nê waştişê şima sloganê xo de ard ziwan. Ma zaf bi coş û xo ra bawer ê. 8ê Adare mijdanîya wisar û aştîye ya. Ma nê 8ê Adare de zaf bi hêz ê. Azadîya ma zaf bi qîmet a. Azadîya cinî ya xopawitişî çîyêk ke ma bi dest bikerê zehmet o. Coka zî pîya meydanan de rayîr ra şêrê zaf bi qîmet o. Ma bi hêvîye têkoşînê xo pîl kenê û hem zî ma benê hêvî. Ma wazenê ke hemleyê 8ê Adare de pîya bê ke ma pîya rayîr ra şêrê. Ma do badê 8ê Adare zî bi eynî bawerî û heskerdişî Newroze pîroz bikerê.”

 

'Ma do bireng û kulturê xo meydanan de bê' 

 

Komeleya Demê Cinî Derya Aslan, dîyar kerd ke serra 2024ine ke tewr zêde kiştişê cinîyan pê ameyî û vat: “Ma sey cinî têkoşînê xo yê hemverê kiştişê cinîyan û şîdetê dewleta camêrdî meydanan de pîl kenê. Ma do bi reng, kulturê xo û bi coşê xo meydanan de bê. Ma zanê ke heta cinî azad nêbo, komel azad nêbeno û nê serî de ma pêro cinîyan dawetê venga azadî kenê. Bêrê ma pêro bi tilîliyê xo beşdarê 8ê Adare bibê."

 

'Ma çiqasî birêxistin bibê ma hende qezenc bikerê'

 

Endama Komeleya Demê Cinî Newroz Ûnverdî zî wina vat: “Serra 2024ine de cinîyan hemverê sazûmanîyê birêxistinbîyayîşî yê şîdetê dewleta camêrdî, polîtîkaya pelçiqnayîşî û polîtîkaya bisînorkerdişê cinîyan, meydanan û kuçeyan nêteriknayî. Ma do 8ê Adara 2025ine bi têkoşîno ke serra 2024ine û serranê verênan ma dayo pêşwazîkerdiş. Ez venga pêro cinîyan dana ke 8ê Adare de meydanan de bê. Ma çiqas wareyan de bê û ma çiqasî birêxistin bibê, ma hende qezenc kenê. 25ê Teşrîna Peyêne de ma bi sloganê ‘Jin jiyan azadî’ meydanan de bî. Ma do 8ê Adare de zî bi ‘Jin jiyan azadî’ meydanan pirr bikerê. 8ê Adare saete 13.00ine dema do Kadikoy de kombîyayîşê cinîyan de, saete 19.30ine de zî Taksîmê Tûnelî de bêrê têhet. Ma bi sloganê ‘Jin jiyan azadî’ meydanan de yê û paweyê pêro cinîyan ê.”