Mîdye Miqted

 

HELEB - Cinîyê Helebî reaksîyon vera hêriş û tehdîdê ke rojnamegeran ameyî kerdiş mojnayî û dîyar kerdî ke ganî o vengo ke mûxabîran rê yeno astengkerdiş, berz bikerê û wina vatî: "Ganî rojnamegerê cinî azad têbigêrê."

 

Heleb û Rojawanê Kurdistanî de rojnamegerî benê hedef, înan rê tehdîdî yenê kerdiş. Binê verasîya şerî de rojnamegerî yenê qetilkerdiş. Benê hedefê Tirkîya û HTŞyî. Heleb de zî tehdîd cinîyanê rojnamegeran rê yeno kerdiş û karê înan yeno astengkerdiş. Hemverê hêriş û tehdîdkerdişî rojnamegerê cinî Heleb de reaksîyonê xo mojnayî û wina vatî: "Bi taybetî milê pawitişê cinî ya Sûrîyeya neweyî de mûxabîrîya cinî bi sereyê xo vengê raştî ya. Coka ganî ma vengê cinî biresnê pêro komelî.”

 

'Yê ke rêça raştî vejenê mûxabîrê cinî yê'

 

Îdarekara Ofîsê Neqlkerdişî ya Partîya Şarî ya bajarê Helebî, Necla Çerkes wina vat: "Ewro bi rijnayîşê rêjîmê Baasî ma ver bi awankerdişê Sûrîyeya neweyî de şinê la heta ke demokrasî bêro, ganî pêro wareyî cayê xo ci de bigîrê û sere de cinî, waştişê ma hukmatê Şamî ra o yo ke reyke de rolê cinîyanê rojnamegeran, mûxabîran peygoş nêkerê. Sûrîyeya neweyî de, semedo ke yê ke vengê raştîyê Sûrîye û vengê cinîyanê Sûrîye biresnê dinya û rayapêroyî rojnemegerê cinî yê. Yê ke rêça rasteqîn verdenê bêşik mûxabîrê cinî yê."

 

'Mûxabîrîya cinî vengê rastîye yo'

 

Eynî wextî de pêşkêşkare û mûxabîra cinî Narîman Şêxo zî nêrazîbîyayîşê xo hemverê astengkerdişê xebatanê mûxabîranê cinîyan ard ziwan û wina vat: "Roja ma ya ewro de xebatê neqlkerdişê wayîrê mûhîmîyêk bêsînor ê. Bi taybetî milê pawitişê cinî yê Sûrîyeya neweyî de mûxabîrîya cinî bi sereyê xo vengê raştî yo. Coka ganî ma vengê cinî biresnê temamê komelî."

 

'Ganî heqê cinîyan nêro pelçiqnayîş'

 

Mûxabîre Rewan Lejîn zî fikrê xo ajansê ma dir pare kerd û wina vat: "Awankerdişê Sûrîyeya neweyî de ganî tu wext heqê cinîyan nêro pelçiqnayîş. Semedê nê zî ma do xo ver bidê û ma do sey mûxabîrê cinî pêro cinîyan rê bibê palpişt. Çîyo tewr mûhîm zî ganî ma rêxistinbîyayîşê xo xurt bikerê û paştdayîşê ma bêro kerdiş ke ma amanc û waştişanê xo welatê xo de pê bîyarê. Eynî wextî de ma wareyê cuye de cayê xo bigîrê.”