Rozerîn Gultekîn

 

STENBOL - Hemsereka Pêroyî ya ÎHD’yî Eren Keskîne derheqê vengdayîşê ‘aştî û komelê demokratîke’ yê Rayberê PKK’yî Abdullah Ocalanî û gamê ke ganî bêrê eştiş ser o qisey kerd. Eren Keskîne da zanayîş ke ganî sîstemê înfazî bêro vurnayîş û wina vat: “Ma pawitoxê heqî, biqerar ê ke rayîrê aştîye de wezîfeyê xo dewam bikerê. Wezîfeyê muhîmî kewenê milê rêxistinê komelê sivîlî ser o, partîyê sîyasî û rêxistinê cinîyan.”

 

Vengdayîşê Rayberê PKK’yî Abdullah Ocalanî pêro dinya de bi kelecanêk pîl ame pêşwazîkerdiş û pêro hetan dîyar kerd ke ganî dewlete cewab bido nê vengdayîşî û gaman bierzo. Hemsereka Pêroyî ya Komeleya Heqê Merdiman (ÎHD) Eren Keskîne derheqê vengdayîşî de û gamê ke bêrê eştiş de ercnayîş kerd.

 

‘Semedê kurdan tu çîyêk peynî nêbeno’

 

Eren Keskîne wina qal kerd: “Şarê kurdî ke hende zext, bêedaletî û merg ciwîyayê, tu çîyêk peynî nîyo. Her tim destpêkêk o. No hetê demokratîkbîyayîşî de zî do bibo wesîleya destpêkî. Ez venga Birêz Ocalanî zî nê hetî ra ercnena. Bê şuxilnayîşê çekan çareserîya mesela zaf muhîm a. Badê vengdayîşê Ocalanî vernîya partiyê sîyasî NY, Amerîka û Almanya eşkerayîye dayî. No zî mojna ke babeta kurdan çiqas babetêka mîyanneteweyî ya. Pêro averşîyayîşê Kurdistanî tesîrê yewbînan kenê. Na cografya de hewce bi çareserî û naskerdişê nasnameyê kurdî est o. Ganî dewlete nê şansî baş biercno.”

 

Gama huqûqî ganî bêro eştiş: Vurnayîşê sîstemê înfazî

 

Eren Keskîn dîyar kerd ke ganî gama ewilî azadbîyayîşê tepişteyê sîyasîyan bo û vat: “Dewleta komara Tirkîya ne goreyê huqûqê xo û ne zî goreyê,  peymanê mîyanneteweyî têgêrena. Ganî no proses bikewo binê asayîşê huqûqî. Her keso ke vatişê xo vano, ganî bikewê binê asayîşê huqûqî. Semedê prosesê bînî de no nêame kerdiş û her kes ame muhakemekerdiş û tepiştiş. Tirkîya goreyê peymanan têbigêro xora no proses do binê asayîşî de bo. Ganî sîstemê înfazî bêro vurnayîş.”

 

‘Wezîfe keweno milê her kesî ser o’

 

Eren Keskîn tewr peyîn wina vat: “Rêxistinê sivîlî, sendîka, partîyê sîyasî, rêxistinê cinîyan, her kes wayîrê wezîfeyê pîlî yê. Ma amadeyê ke pêro wezîfeyê xo semedê aştî ca bîyarê. Ma do kom bibê la ez bawer nêkena çîyêk cîya vejîyo. Çike ÎHD bi serran o semedê aştî têkoşîn keno. Ganî vengdayîşê ewil sendîkayan rê bêro kerdiş. Serdestîyê aştîye yena manaya agêrayîşê nano ke sifreyê karkeran ra ameyo diznayîş. Ziwanê şerî, serdestîyê camêrdî, mîlîtarîstî ra tewr zêde cinî zirar vînena. Vilabîyayîşê şîdetî sey ziwanê dewlete vernî cinîyan gêno. Tewr zêde lazimîya cinîyan bi aştîye est a, ganî têgêrayîşê cinîyan wayîrê prosesê aştîye vejîyê.”