AMED- MYK’ê DBP’yî serrgêra Komploya Mîyanêtneweyî ser o eşkerayîya nuşteyî da û eşkerayîye de wina ame vatiş: “Ganî bi lezî azadîya Birêz Ocalanî, bêra zexmkerdene û zemînê demokratîke zî wa bêro awankerdene.”

 

Heyetê Îdarekarîya Merkezî (MYK) yê Partîya Herêmanê Demokratîke (DBP) bi wesîleya serrgêra komployê mîyanneteweyî yê hemverê Rayberê PKK’yî Abdullah Ocalanî de eşkerayîyêke nuşteyî weşan kerd. 

 

Eşkayîye de ame vatiş ke serê Komployê Mîyanneteweyî yo ke vera Abdullah Ocalanî virazîya ra 26 serrî vîyartî û ame vatiş: “Tesîrê komployo ke şexsê Birêz Ocalano ke 15ê sibata 1999î ra nata Zîndanê Îmrali de, şertanê ke tede huqûq û peymanê mîyanneteweyî pelixîyenê de tepişîyeno de qewimîya, hema zî rixmê hende serran domîyeno.”

 

‘Birêz Ocalan helwestêk tarîxî rayîr ra berd’

 

Eşkerayîye wina dewam kerd: “Aqlo ke şaran rê şer û neçareserîye ferz keno, naye ra 26 serran verî komployo ke ard ca reyde şexsê Birêz Ocalanî de plan kerd ke sere de şaro kurd têkoşînê demokrasî, aştîye û azadî yê heme şaran tesfîye bikero. Modernîteya Kapîtalîst a ke komplo ard ca hetêk ra Şerê Dinya yo III. kirişt asta bîne, hetekê bînî ra zî gêrayîşê komelê demokratîk o ke Rojhelatê Mîyanênî rê çareserîya mende bîyaro, hedef girewt.

 

Xeta têkoşînê globale awan kerd

 

Labelê hêzê komplogerî çi astêka prosesî de nêresayî armancanê xo. Çike seba averberdişê xîretanê çareserîya persa kurdan Birêz Ocalano ke Rojhelato Mîyanên û Ewropa de têkilîyan virazeno, rixmê pêro şertanê tecrîdê giranî zîndanê Îmrali ravurna wareyê xoverdayîşî û reftaro seserrane ramojna. Na qerardarîye û reftar eynî wext nîşan danê ke Komployo Mîyanneteweyî nêresayo armancê xo. Birêz Ocalanî şaran rê mojna ke cuyêka newî û azade bi paradîgmaya demokratîk, ekolojîk û azadîwaza cinîyan yena awankerdene. Şaranê Rojawanî yê ke vengdayîşê Birêz Ocalanî goşdarî kerd, bi xoverdayîşê xo yê destankî fikrîyatê Birêz Ocalanî ard ca û Şorişê Rojawanî sey modelê şaran o hempar heme dinya rê dîyarîye kerd. Ewro Modelê Rojawano ke çol de wahe yo, bi serkêşîya cinîyan vera pergalê camêrdî tecrubeyanê têkoşînî rê roştî dano. Cinîyê ke bi taybetî Şorişê Rojawanî ra hêz genê, felsefeya “Jin, Jiyan, Azadî” Rojhelat ra ver bi Hîndîstan û heme hetanê dinya kirişte û xeta têkoşînî ya globale viraşte.

 

Modelê Rojawanî ameyoxêk azad û demokratîk o

 

Ewro sere de Kurdîstan û Tirkîya bingeyê krîzanê komelkî û sîyasîyan yê ke Rojhelatê Mîyanênî de qewimîyenê de persa kurdan de polîtîkayê neçareserî est ê. Seke Modelê Rojawanî yo ke şaran rê ameyoxêkê azad û demokratîkî peyda keno de eşkera bî, fikrîyatê çareserî yê Birêz Ocalanî seba krîzan rayîrê vejîyayîşî bî. Ma wazenê bale bianjê ke ameyoxê çi ferasetêkê sîyasî yo ke raştîye rê çimanê xo nimino, çin o.

 

Ganî no proses bi gamanê pratîk aver şêro

 

Birêz Ocalan îradeyê çareserî yo ke wazeno persa kurdan bi dîyalog û pêvînayîş çareser bikero, na perse sey persa demokratîkbîyayîşê Tirkîya hesibneno, xîret keno ke astengîyanê ke şaran, cinîyan û bawerîyan azadîye, têduştîye û aştîye ra cira kenê wedarneno yo. Nê konteksî de ewro heme komel pêvînayîşanê Îmrali bi baldarî taqîp keno û seba ke nê pêvînayîşî bi hawayêko pozîtîf biqedîyê piştî dano. Komel paweno ke prosesê aştîye, pêvînayîş û çareserîye bi gamanê pratîkan aver şero.

 

Mesuldarî û wezîfeyêko tarîxî yo!

 

Ganî nêro xo vîr ra kerdene ke çareserîye û aştîya ke Birêz Ocalan keno ke bîyaro ca, heman wext têkoşînê awankerdişê Tirkîyaya demokratîke yo. Nê semedî ra azadîya Birêz Ocalano ke Îmrali de seba îtîfaqê tarîxî û stratejîkî yê tirk, kurd û pêro şaranê herême heme estbîyayîşê xo peyda keno, desinde bêro dayene û zemîno demokratîk bêro sazkerdene. Ma reyna anê ziwan ke fikriyat û îradeyê çareserî yê Birêz Ocalanî, seba awankerdişê ameyoxêkê demokratîk û azadî firsend o. Wayîrvejîyayîşê nê îradeyî mesuldarî û wezîfeyêko tarîxî yo!”