AMED - Hêrişê Vakur û Rojhelatê Sûrîye ser her je şinê zêde benê û reaksîyonê hemverê hêrişan de dewam kenê. Welatijê ke bi armancê protestokerdişê hêrişan yenê têhet, bale ancenê serê muhîmîyê pêvînayîşê Rayberê PKK'yî Abdullah Ocalan dir û wina vanê: “Ganî pêro şarê kurdî paştdayîş bido Rojawanî.”

 

Cinîyê ke 28ê çeleyî de bi armancê şermezarkerdişê hêrişê hemverê Vakur û Rojhelatê Sûrîye, Amed de ameyî têhet, JINNEWS’î rê qisey kerdî.

 

‘Heta Rojawan azad nêbo ma do têkoşîn bikerê’

 

Ayhan Yildiz da zanayîş ke ganî paştdayîş bêro pîlkerdiş û wina vat: “Ma Rojawan de na rey zî sey Kobanê serkewtiş hêvî kenê. Ma zî semedê înan yenê têhet. Heta ma sax bê ma do pey înan de bê. Ma bikişê, qetil bikerê zî ma do xo ver bidê ke heta ke Rojawan bi pêroyî sey Kobanê xelas bibo. Ganî ma 4 parçeyê Kurdistanî de Vakurê Kurdistanî ra heta Rojawan semedê şarê xo sere wedarnê. Bêrê ma xo ver bidê ke moralê înan tewr zêdeyêr berz bibo.”

 

‘Ma semedê Rojawanî tîya yê’

 

Sabîha Akkaya zî wina vat: “Wa şerê Rojawanî vindarnê. Kiştişê şarê uca bes o. Kurd û tirkî birayê yewbînan ê. Kes şer nêwazeno. Çira înan herra înan ser o sere birnenê? Vanê ke ‘yê ke ko de yê, wa çekanê xo ronê û bêrê’. Ê zî aştîye wazenê. Ma ewro semedê Rojawanî uca de yê. Wa no şerê Rojawanî vindaryo. Ganî pêro şarê kurdî zî paştdayîş bidê Rojawanî. Serkewtiş înan dir bo. Hêvî kena no şer peynî bibo.”

 

‘Ganî pêro şar wezîfeyê xo ca bîyaro’

 

Menîce Yenî zî wina vat: “Ez hêrişê Rojawanî şermezar kena. Ez hêvî kena ke şerê ucayî demêk nêzdî de biqedîyo. Uca xoverdayîşêk zaf baş est o, birîndar û şehîdanê xo pawenê. Şarê Vakur û pêro şarê bînî, ganî her çî bikerê. Ganî ma înan bipawê. Ganî her roje bikewê kuçeyan û nê hêrişan şermezar bikerê. Ganî ma siba û şan de bixebitîyê. Şarê Kurdistan û Rojawanî rê serkewtiş wazena û tîya ra silamanê xo înan rê şirawena.”

 

‘Mifteyê aştîye Îmrali yo’

 

Reşehat Ada dîyar kerd ke ganî hêrişê Rojawanî peynî bibê û wina vat: “Ma vanê, 'ganî şerê Rojawanî û topvaran bêro vindarnayîş.’ Eke nê şerî nêvinderê, ma do sey pêro welatperweran şêrê uca. Eke ma kişenê wa bikişê zî. Ma tutanê xo terk nêkenê. Uca de canê xo feda kenê, ma tîya roniştê û wijdanê ma rehet nîyo. Ma paştdayîş bidê înan û tank û topê înan vindarnê. Ganî êdî dayikî leşkeran û dayikê gerîlan nêbermê. Ez hêvî kena ke aştî pê bêro û mifteyê nê aştî zî Îmrali de yo. Wexto ke ma ê berî akerd, do her çî baş bibo.”