STENBOL-Hemsereka DEM Partîye ya Stenbolî Gonca Yangoz semedê ‘Mîtîngê Aştîye yê semedê Azadîye’ veng da û vat: “Ma sey yê ke aştî û edalet wazenê hemverê feqîrî, qetilkerdişê cinîyan, xoza û heywanî û semedê aştîye uca de bê.”

 

Pêvînayîşê Heyetê Partîya Têduştî û Demokrasî (DEM Partî) yê Rayberê PKK’yî Abdullah Ocalanî dir dewam kenê. Derheqê pêvînayîşê ke yenê kerdiş de gamêke somut nêvejênê werte û heto bîn ra zî semedê aştîya komelî bi serran o xebate dewam kenê. Rêxistina DEM Partî ya Stenbolî na çarçewa de 2yê Sibate de ‘Mîtîngê Aştîye yê semedê Azadîye’ do Meydanê Esenyurtî de bi tewrbîyayîşê hemsereka DEM partîye Tulay Hatîmogullari organîze bikera.

 

‘Ma waştişê aştîye berz bikerê’

 

Hemsereka DEM Partîye ya Stenbolî Gonca Yangoz derheqê prosesê yenê ciwîyayîş de qisey kerd û vat: “Krîzo ke welat de yeno ciwîyayîş, polîtîkaya şerî ra cîyayî nîna destgirewtiş. Nê semedî ra waştişê aştîye muhîm o. Qirkerdişê cinîyan, xoza, heywanî, feqîrî, binpaykerdişê heqan, caardişê zîndanan girêdayeyê şerî yê. Nê semedî ra ma waştişê aştîye berz bikerê. Ma do na çarçewa de mîtîng bikerê. Ma wazenê pêro şaran dir vengê xo berz bikerê. Îqtîdar semedo ke bîyayîşê xo dewam bikero, lazimî bi şer vîneno. Ma zî hemverê nê de yê, qebûl nêkenê û veng danê ke pêro kesî a roje meydanan de verê ma de bibê.”

 

‘Ma hetê aştîyêk mende de yê’

 

Gonca Yangoz dîyar kerd ke têkoşînê înan tena semedê înan nê, semedê pêro şarî yo û vat: “Ma hetê aştîyêk mende de yê. Derdê ma o yo ke ma  muxalefetê komelî zêde bikerê, waştişê aştîye berz bikerê. Ma hetê aştîyêke bi rumet û mende de yê. Semedê têduştîya şaran, semedo ke pêro kesî têduştî biciwîyê, bi ziwan û nasnameyê xo biciwîyê, ma vanê aştî."

 

‘Do fotografêk aştî bibo’

 

Gonca Yangoz tewr peyîn wina vat: “Bi tewrbîyayîşê hemsereka ma ya pêroyî Tulay Hatîmogullari Meydanê Esenyurtî de saete 13.00ine de ma do bêrê têhet. Ma pêro şarê xo dawetê mitîngî kenê. Ma semedê kede, edalet û aştîye têhet de bê. Wa her kes bi reng û nasnameyê xo bi waştişê xo uca de bo. Ma semedê aştîye vengê xo berz bikerê. Do o zî bibo fotografê aştîye.”