MERKEZÊ XEBERAN -Komeleya Heqê Merdiman ê Kurdistanî neql kerd ke çalakîkera bi nameyê Perwîn Edwayî bajarê Merîwan yê Rojhelatê Kurdistanî hetê hêzê Îranî ra ameya destbendkerdiş û berdê cayêk nêdîyar.

 

Pêlê tepiştiş û destbendkerdişê welatijê kurdan, hetê rejîmê Îranî ra dewam keno. Komeleya Heqê Merdiman ê Kurdistanî bi eşkerayîyêke neql kerd ke çalakîkera kurde bi nameyê Perwîn Edwayî bajarê Merîwan yê Rojhelatê Kurdistanî ameya destbendkerdiş û tu agahî aye ra nîna girewtiş.

 

Komeleye dîyar kerd ke serra 2019ine de dadgeha Îranî bi tometê ‘çalakîyê hemverê asayîşê nîştimanî û hemkarîyê şarî muxalefetê Îranî’ 4 serrî cezaya zîndanî birnaya.

 

Goreyê dayeyê Komeleya Heqê Merdiman ê Kurdistanî, serra vîyarte de (2024) zêdeyêrî 586 kesî Rojhelatê Kurdistanî de ameyê destbendkerdiş û 30 înan ra cinî yê.