STENBOL- Edîtora ETHAyî Nadîye Gurbuz hêrişê hemverê çapemenîya azade ercna û da zanayîş ke ganî rojnamegerî hîn zêde bêrê têhet û têkoşîn bikerê.

 

Hêrişê îqtîdarê AKP-MHPyî yê çapemenîya azade ser o her ke şinê zêde benê. Îqtîdaro ke nêwazeno heqîqet bireso şarî, rojnamegeran qetil keno, destbend keno, tepişneno û hesabê çapemenîya komelî û înternetî asteng keno.

 

Edîtora Ajansê Xeberan ê Etkînî (ETHA) Nadîye Gurbuz, derheqê tedayê ke yenê ciwîyayîş de ercnayîş kerd. 

 

‘Ma hetê kesê ke têkoşîn kenê yê’

 

Nadîye Gurbuz dîyar kerd ke teda, sansur, qetilkerdişê rojnamegeran bi amancê vernîya heqê xeberan ê komelî bêro padayîş yeno kerdiş û vat: “Rojnamegerî pey raştî de yê. Hetêk ra rojnamegerê ke pey raştî de yê est ê, hetêk ra zî rojnamegerê ke hetê sîstemî yê est ê. Çapemenîya azade raştîyan dana eşnawitiş û nê semedî ra zî hêrişan dir yena rî bi rî. Ganî rojnamegerî bêhet bê. La ma bêhet nîyê û ne zî hetê sîstemî yê. Ma hetê bindestan ê, ma hetê kesê ke têkoşînê şarî dewam kenê yê.”

 

‘Wazenê vernîya raştîyan padê’

 

Nadîye Gurbuz bale ant padayîşan ser o û vat: “Padayîşê hesabê çapemenîya komelî, bi amancê raştî tarîye de bimanê kenê. Padayîşê malper û hesabê twîtterî her tim kenê. Eynî wextî de hesabê  instagram û twîtterî zî hêrişan dir rî bi rî manenê.  Belê, tena rojname estbî. Kanalê televîzyonan kêmî bî. La nika teşeyê xoresnayîşê merdiman zêde bîyo. Nê semedî ra wazenê ke agahîyê raştî manîpule bikerê û nêresnê şarî.”

 

‘Xêrcê têkoşînî şansêk bîn çin o’

 

Nadiye Gurbuz tewr peyîn wina qalî kerd: “Xêrcê têkoşînî rayîrêk bîn yê çareserî çin o. Rêxistinê meslegî yê çapemenîye, sendîka na babete de qels ê. Xora cemîyet ma sey rojnameger nêvîneno. Senî dewlete ma sey rojnameger nêvînena, terorîst îlan kena, cemîyet zî wina yo. Nimûne; Nazim û Cîhane ameyî qetilkerdiş. Sendîkayê Rojnamegeranê Tirkîya bi rojan bêveng mend. Badê ke hevalê ma ameyî tepiştiş, eşkerayîyêke dayî. Rewşa ke ma têkoşîn nêkerê de do hêrişî dewam bikerê. Semedê vurnayîşê xêrcê têkoşînî şansêk ma yê bînî çin o.”