MERKEZÊ XEBERAN - 42 alimê dînî yê Rojhelatê Kurdistanî derheqê tesdîqkerdişê cezaya dardekerdişî ya tepişteya sîyasî ya kurde Pexşan Ezîzî û Werîşe Muradî eşkerayîyêke da.

 

42 alimê dînî yê Rojhelatê Kurdistanî hemverê tesdîqkerdişê cezaya dardekerdişî ya tepişteya sîyasî ya kurde Pexşan Ezîzî nêrazîbîyayîş mojna û rejîmê Îranî ra waştî ke cezaya dardekerdişî ya Pexşan Ezîzî û Werîşe Muradî rê ameya birnayîş, bêro betalkerdiş.

 

Eşkerayîye de wina ame vatiş: “Ma sey 42 alimê dînî yê kurdî yê Rojhelatê Kurdistanî wazenê ke cezaya dardekerdişî ke bi hawayêk bêhuqûqî Pexşan Ezîzî û Werîşe Muradî rê ameyê birnayîş, betal bikerê.”

 

Dewam de ame vatiş ke ganî îqtîdarê Îranî peynîya pêlê destbendkerdişê welatijan bîyaro, eke peynîya tedayan nêaro do şar û hukmat zêdeyêr yewbînan ra dûr bikewê.