ANQARA – Tepişteya nêweşîya girane Ozge Ozbek şert û mercê zîndanî de her roje ver bi mergî şina. Avûkata Ozge Ozbek waşt ke Ozge Ozbeka ke semedê muameleya xirab, polîtîkayê cîyayî û xemsarî têkoşînê cuye dana, lezkî bêro veradayîş.

 

Ozge Ozbeka ke 27ê teşrîna verêne 2020ine de semedê tumorê mezgê aye de Nêweşxaneyê Acîbademî yê Stenbolî de emeliyatê mezgî bîbî, badê emelîyatî bi sebebê, "endamîya rêxistine" ameye tepiştiş û şirawitî Zîndanê Cinîyan ê Bakirkoyî. Ozge Ozbeka ke rewşa aye ya weşîye giran a, netîceya muracatê Sazgehê Tibê Edlî yê Stenbolî de 3 aşmî cezaya aye amebî taloqkerdiş La badê nê prosesî ancî ameye tepiştiş û şirawitî Îzndanê Girewteyê Cinîyan ê Gebzeyî.

 

Nêweşxaneyê Perwerde û Cigêrayîşî yê Darîcayî 24ê Kanûna 2021ine de semedê Ozge Ozbeka ke semedê şert û mercê zîndanî rewşa aye ya weşîye nêbaş bî, raporêk dabî û vatibî, "Şert û mercê zîndanî de mendişê aye baş nîyo." La Sazgehê Tibê Edlî yê Stenbolî no rapor qebûl nêkerd û raporê, “eşkena zîndan de bimano” da. Nê heyamî de tumorê mezgê Ozge Ozbek de her ke şîne zêde bîne û şert û mercê zîndanî nêverda ke wextê xo de bêro dermankerdiş.

 

'Heyeto ke rapor dano, ATK qerarê tahlîye nêdano'

 

Avûkate Nurdan Kiliç, dîyar kerd ke Ozge Ozbek reya ewilî kewte zîndan, aye dir tûmorê tehlukeyînî estbî û nê prosesî wina vat: “Badê emelîyatî ancî yena tepiştiş û kenê Zîndanê Gebzeyî. Semedê nêweşîyê aye yê xidarî û nêbîyayîşê îmkanê dermankerdişî, çeleyê 2023ine de sewqê Zîndanê Girewteyê Cinîyan ê Sîncanî ameye kerdiş. Nê prosesî de raporê heyetî yê semedê teşhîskerdişî ame dayîş û ame vatiş ke 'rewşa aye ya weşîye semedê zîndan de bimano munasib nîyo’la semedê qerarê ATKyî nêameye veradayîş." 

 

'Polîtîkaya cîyayî'

 

Nurdan Kiliç bale ant serê helwestê cîyayî yê xebatkarê weşîye yê hemverê tepişteyan û vat, “Semedê bedenêk saxlem zî zêdeyêr dermanan şuxilnena. Doktorêk Nêweşxaneya Bajarî yê Etlikî semedo ke xeylêk reyan nêweşîyan anê derheqê wezîfedaranê înfazî de gere kenê û goreyê hîn doktoran zî tedawîya aye çin a. "

 

'Bedêlê çareserî de xemsarî est o'

 

Nurdan Kiliç dîyar kerd no problem semedê kabînê tengî yê sewqê nêweşxaneyan de yenê şuxilnayîş û serserdîya selahîyetdaran ra no problem kronîk bîyo û wina vat: “Goreyê Protokolê hîrê hetî yê serra 2011ine, ganî qawîşê tepişteyan goreyê mîqyasê ameyê dîyarkerdiş bêrê viraştiş. La no protokol bi tu hawayî bica nêardî. Problem mabêne cendirme, wezaret û îdareyê zîndanî de açarya krîzê berpirsîyarî.”