STENBOL - Kitabo ke rojnamegera tepişteye Serpîl Unal rê ame şirawitiş, bi sebebê "Kargoyê mîyanê Stenbolî de nînê qebûlkerdiş" ame astengkerdiş. 

 

Semedê rojnamegere Cîhan Bîlgîn û Nazîm Daştan yê ke 21ê Kanûne de wextê xeberanê Vakur û Rojhelatê Sûrîye taqîb kerdêne, netîceya hêrişê hewayî yê artêşa tirkan de dinyaya xo bedelnabî, Meydanê Şîşhane yê Beyoglû yê Stenbolî de çalakîyêke ameye organîzekerdiş. Çalakîye de 59 rojnamegerî û pawitoxê heqê merdiman ameyî destbendkerdiş.

 

Kesê ke ameyî destbendkerdiş 7 rojnamegerî û 2 welatî bi sebebê "propagandaya rêxistina terorî kerdê" tepişyayî. Kitabo ke rojnamegera cinî ya tepişteye Serpîl Unal hetê hevalanê aye yê rojnamegeran ra şirawitibî zîndan, nêame girewtiş. Zîndanê Bakirkoyî, kitabo ke Serpîl Unal rê sey dîyarîya serra neweyî amebî şirawitiş, bi vatişê "Kargoyê mîyanê Stenbolî de nîno qebûlkerdiş" açarnayî.

 

Zîndanê Bakirkoyî ke 2 aşman ra reyke 7 kitaban danê, tena rojbîyayîş û şewa serrneweyî de kitaban qebûl keno û "qedexeyê kargoyî yê Stenbolê" dir rayîr vernîya nê padano.