MERKEZÊ XEBERAN - Rojnamegeran Wan de waştî ke derheqê qetilkerdişê rojnamegeran de eşkerayîye bidê. Polîsan hêriş kerd û hêriş de 10 rojnamegerî û xeylêk sîyasetmedarî destbend bîyî. 

 

Komeleya Rojnamegeran ê Dîcle Firatî (DFG) û Komeleya Rojnamegeran ê Mezopotamyaye (MKG) waştî ke Wan de derheqê rojnameger Nazim Daştan û Cîhan Bîlgîne yê ke Vakur û Rojhelatê Sûrîye de bi SÎHAyê dewleta tirkan ameyî qetilkerdiş, eşkerayîye bidê. Platformê Kede û Demokrasî yê Wanî zî paştdayîş da çalakîye. 

 

Vernîya eşkerayîye, polîsan Kuçeyê Hunerî kerd binê ablûqa û hêrişê koma rojnameger û sîyasetmedarî mîyan de bî, kerd. Netîceya hêrişî de mûxabîra ajansê ma Memîhan Zeydan, mûxabîra Ajansê Mezopotamyaye (Ma) Rûken Polat, Ozlem Yacan, Mazlum Engîndenîz û Sema Yuce Polat, mûxabîrê Ajansê Welatî (AW) Bazîd Evren û Firat Tunç, rojnamegere Zelal Tunç, Nîmet Olmez  û Oktay Candemîr destbend bîyî. Eynî wextî de xeylêk sîyasetmedarî zî ameyî destbendkerdiş.