Gulîstan Gulmuş

 

ŞIRNEX - Cinîyê kurdî, bi bedenê xo yê bêgane zî benê destan. Kênaya dayîka Taybete ke bedelê nasnameyê kurdî bi ganê xo da, Şaristan Algan 9ine serrgêra qetilkerdişê dayîka xo de vat: “Ma est ê û ma do timî bibê. Çi beno wa bibo, ma fek dewaya xo ra vera nêdanê.”

 

Serranê 90an de badê veşnayîş û vengkerdişê dewan, mabêne 2015-2016ine de Kurdistan de qedexeyê tebervejîyayîşê kuçeyan ame ciwîyayîş û uca de her tewirî hêrişê qirkerdişî ame kerdiş. Pêwa her çî ancî zî kurdan peyser game nêeşt û   têkoşînê xo dewam kerdî.

 

Sûr, Cizîr û Sîlopîya de cinîyan cepheyê vernî de ca girewtî û waştî ke herra xo, tutanê xo bipawê. Cinî tîya de bîyî kerdox. Sêvê, Pakîze, Fatma û bi seyan cinîyê bînî. Bêguman Dayîka Taybete ya ke bîye deyîra xoverdayîşê kurdan.

 

Dayîka Taybete kam a?

 

Taybet Înan 19ê Kanûna 2015ine de taxa Nuhî ya Sîlopîya de kuçeyê 58ine de wexto ke keyeyê cîrana xo ra agêrayîne, hetê leşkeran ra ameye qetilkerdiş. Cenazeya Taybet Înane 7 rojî û 7 şewî kuçe de mende.

 

Vistewreyê aye ke şêro aye xilas bikero ame qetilkerdiş

 

Birayê mêrdeyê aye Yusuf Înan ke şinawit dayîka Taybete ameya qetilkerdiş, waşt ke şêro bîyaro. La  Yusuf Înan zî kuçe de ame qetilkerdiş. Badê mêrdeyê aye waşt ke şêro hetkarî la ey zî birîndar kerdî.

 

‘Nuştoxê nê qirkerdişî dewlete ya’

 

Lajê Dayîka Taybete mektubêke nuştibî de wina vat: “Şima dayîka mi qetil kerd. Tutê şima est ê gelo? Tutê şima çinbê zî wayîrê şima est ê. Ez nêvana no dejêk senîn o, la zaf giran o. Dayîka mi 7 rojî û 7 şewî erd de mende û bi bîrîndarî bi rojan mende. Şima dayîka mi qetil kerd. Nuştoxê nê qirkerdişî dewlete yo.”

 

Badê Dayîka Taybete kênaya aye Heznî Înan zî ameye qetilkerdiş

 

Kênaya Dayîka Taybete, Heznî Înan zî qedexeyê tebervejîyayîşê kuçeyan de taxa Cudî ya Cizîrî de bodrumêk de ameye qetilkerdiş. Îqtîdarî îdia kerd ke Taybet înan hetê PKKyî ra ameya qetilkerdiş. La raporê otopsî nê pûç kerd û eşkera bî ke leşkeran gule rijnayo.

 

Badê 9 serran: Ma do her tim aştîye biwazê

 

Kênaya dayîka Taybete, Şaristan Algan wina vat: “Serra ke dayîka mi ameye qetilkerdiş bi rastî semedê ma serrêke tewr zor bîye. Ma zaf dejî antî. Tu cayêk de çîyêk winasî nêameyo ciwîyayîş. Bifikrîyê cenazeya kesêke 7 rojan kuçe de manena. No semedê ma zaf zor bî. 9 serrî qirkerdişî ser o derbaz bî. Sûcdarî nêameyî muhakemekerdiş. Ma do pey dewaya xo de bibê. Ma do her tim aştîye biwazê.”

 

‘Ma est ê û ma do bibê’

 

Şaristan Algan tewr peyîn wina vat: “Sebebê pêro hêrişan nasnameyê kurdan o. Derdê înan ziwanê ma yo. Nêwazenê ma ziwanê xo bişuxilnê. Ma est ê û ma do her tim bibê. Dayîka mi 7 rojan kuçe de mende. Ma nêeşkayî tu çîyêk bikerê. No zaf zor bî, no dejêk pîl o.”