Neslîhan Kardaş

 

MÊRDÎN- Dayîkê  Aştîye yê sînorê Nisêbîn-Qamişlo de çalakîya nobete dewam kenê, dîyar kerdî ke semedê aştîye çi destê înan da bêro do bikerê. Hemverê şerî de vengdayîşê yewîye kerdî û vatî, "Yê ke do ser bikewê, ancî kurdî bibê.”

 

Çalakîya nobeta ke 13ê Kanûne ra qezaya Nisêbînî ya Mêrdînî de sînorê Qamişlo ser o hemverê hêrîşê Vakur û Rojhelatê Sûrîye ser o ameya destpêkerdiş, dewam kena. Çalakiya nobete ke bi paştdayîşê TJA, DBP û DEM Partî de destpêkerda, dewam kena. Cinîyê ke tewrê çalakî bîyî zî dîyar kerdî ke tena semedê aştîye nobete gênê.

 

Cinîyê ke bajarê Elîhî ra semedê paştdayîş bidê nobeta sînorê Qamişloyî ameyî, derheqê hêrişê Vakur û Rojhelatê Sûrîye ser o qisey kerdî.

 

'Ma do semedê aştîye canê xo feda bikerê'

 

Nuran Seçkin ke Êlih ra beşdarê nobete bîye, wina vat: “Nika Rojawan de wayê û birayê ma û tutê ma vernîya ma de yê. Keyeyê mi newe nêşîyo Rojawan. Ma uca de virazîyayî, ma uca de pîl bîyî. Nika Rojawan de xeylêk merdimê mi est ê. Wa destê dayîkê ke semedê aştîye derg kenê, bigîrê. Aştî do semedê kurd, tirk, ereban baş bibo. Şer û kiştiş çareserî nîyê. Eke ewro wayê û birayê şima uca de bibayîne, şima do hêrişê înan bikerdêne? Her cayî de tutê ma est ê. No şer do heta key wina dewam bikero? Ez sey dayîka aştîye vana, semedê aştîye çi destê mi ra bêro, ez o bikerî. Ma zî semedê aştîye canê xo feda kenê. Tutê ma verê çimanê ma de yenê qetilkerdiş. Hende bêwijdan û bêmerhemet ê. Ez tîya venga pêro dinya kena; her kesê ke vano 'ez merdim a’ wa destê xo bido wijdanê xo ser û fek şerî ra vera bido. Rojêke biciwîyî zî ez o semedê çareserî biciwîyî."

 

'Ma fek waştişê aştîye ra vera nêdanê’

 

Dayîka Aştîye Maşallah Kaya zî qiseykerdişê xo de wina vat: “Ma Êlih ra semedê aştîye ameyî tîya. Ma nêwazenê neynûkê tu kesî bigino kerra ro û bidejo. Ganî cinî û tutî tu cayî de nêrê kiştiş. Ma tîya ra venga pêro dewletan kenê ke ganî fek şerî ra vera bidê. Ma televîzyon de vînenî; cinî û tutî yenê kiştiş. Ma nêwazenê gonî bêro rijnayîş. Ma ewro ameyî ke aştîye pêro dinya misoger bikerê. Heta ke ma sax bê, ma fek waştişê xo yê aştîye ra vera nêdanê.”

 

‘Wa şarê ma bibo yew’

 

Edîbe Orpak zî vat, Rojawan bi têkoşîn ameyo xelaskerdiş û vat: “Seke yeno zanayîş şorişê Rojawan bi cinîyan ameyo kerdiş. Semedê nê ma hêvîya xo nêbirnaya. Heta ke ciwanê kurdî bibê, şorişê Rojawanî xelas nêbeno. Kênaya mi di serrî verê uca de şehîd bî, mi heta nika gorê aye zî nêdîyo. Eke atmosferê aştî û aramî bibo, ma eşkenê gorê xo zîyaret bikerê. Zerrîya mi de hesreta kênaya mi est a. Ez nika kîşta aye de ya. Ez tîya reyke bîn îfade bikerî; wa şarê ma bibo yew. Eke ma bibê yew, ma do ser bikewê. Biciwîyo şorişê Rojava! Yê ke ser bikewê do ancî kurdî bibê. Wa her tim bi hêvî bibê. Ma zanê ke dorê ma de dişmin est o. Senî ke mîlçikî bi baskê xo bawer ê, ma zî bi eynî hewa bi ciwananê xo û hêzê xo bawer ê.”