Elfazî Toral

 

STENBOL - Endama Înîsîyatîfê Rêzdarîya semedê Merdeyan Burcu Çelîk derheqê îşkenceyê kesê ke şer de dinyaya xo bedelnayê ser o ercnayîş kerd û vat: “Cenazeya kamî bena wa bibo, rêzdarîyê hemverê bedenê merdeyî de heqê şîngirewtişî yo. Binpaykerdişê şînî yo. Ganî her kes hemverê kesê ke dinyaya xo bedelnenê, rêzdar bibê.”

 

Dinya de sûcê hemverê cinîyan her ke şino zêde beno, şerê ke yeno kerdiş zî bedenê cinîyan ser o desteştiş û qetilkerdiş dewam keno. Heyet Tehrîr El Şam (HTŞ) 27ê teşrîna peyêne de Heleb de dest bi hêrişan kerd û hêrişan de xeylêk kesî dinyaya xo bedelnayî. Bedenê cinîyê ke ameyî qetilkerdiş, ameyî îşkencekerdiş û teşhîrkerdiş. Endama Înîsîyatîfê Rêzdarîyê semedê Merdeyan Burcu Çelîk derheqê babete de JINNEWSî rê qisey kerd.

 

Burcu Çelîk, bale ant texrîbatê şerî ser û wina vat: “Semedê pawitişê heqê cinî û tutan, ganî demê şerî de cinî û tutanan rê taybetî têbigeyrê. Şeran de teknîk beno ke bivuryo la no esas de serdestîyêk o. Tîya de rolê camêrdan zaf pîl o. Çi heyf ma şeran de mudaxaleyê zaf cîya cinî û tutan ser o vînenê. Goreyê ma derheqê na babete de ma zêdeyêr bişuxilîyê. Bedenê cinî şer de bo zî beno wareyê desteştişî. Ma Sûrîye û Ukrayna eşkenê nimûne bidê.”

 

Şer de bedenê cinî yeno teşhîrkerdiş

 

Burcu Çelîk da zanayîş ke ganî bedenê cinî şer de nêro teşhîrkerdiş û yew sebebê tewr esas yê polîtîkaya zîhniyetê serdestî yê hemverê cinîyan o.  Burcu Çelîk wina dewam kerd: “Camêrd, cuya normal de şîdetê cinîyan ser o meşrû keno. Hetê qanûnî de zî destek gêno û têgêreno. No fehm hawirê şerî de zî dewam keno. Cenazeya cinî ser o zî şîdetê fîzîkî û cinsî meşrû vîneno. Bedenê cinî yeno teşhîrkerdiş.”

 

Heqê qanûnî!

 

Burcu Çelîk tewr peyîn wina vat: “Hawirê şerî de bedenê cinîyan ser o texrîbatan pê anê. Mudaxaleyê cenazeyan kenê. Desteştişê cenazeyan kenê. Bi hezaran tutî şer de vînî benê. Cinîyê vînîbîyaye est ê û qeydê înan xeylê xo çin o. Sey ganîmetê şerî yenê vînayîş. Tîya de esaso tewr zêde yeno binpaykerdiş, heqê şînî yo. Nê her tim demê şerî de yenê vernîya ma. Ma sey Înîsîyatîfê Merdeyan rê Rêzdarî her tim nê kenê esasa vernî. Ganî teslîmgirewtişê cenazeyan bibo û babeta definkerdişî de xesasîyet bêro mojnayîş. Ma her kesî semedê rêzdarîyê hemverê bedenê merdeyî de dawetê têkoşînî kenê.”