Neslîhan Kardaş

 

WAN - Kênaya tepişteya nêweşe Nazîme Avrasa 56 serrî ke pêwa înfazê aye temam bîyo zî hetê zîndanî ra nîna tahlîyekerdiş, Mizgîn Avras wina vat: “Na rewşe nêzdîbîyayîşê hemverê tepişteyan nêweşî mojnena. Heyet, dayîka mi ra vano; ‘semedê sûco ke to kerdo ti poşmana yan nê?’. Dayîka mi zî vana, ez poşman nîya. Tahlîyeyê aye nê semedî ra yena astengkerdiş. Dadgerî qerarê tahlîye dano la heyet red keno.”

 

Tepişteya nêweşa sîyasî Nazîme Avrasa 56 serrî zîndanê Cinîyan ê Sîvrîceyê Xerpêtî de hîrê aşmî yo tepişte ya. Nazîme nêweşîyê aye yê panîk atak û qelbî est ê. Pêwa nê nêweşîya tansîyon û şekirî ya. Nazîme yew tepişteya nêweş a û pêwa înfazê aye temam bîyo zî hetê heyetê çimdarî û taqîbkerdişê zîndanî ra nîna tahlîyekerdiş.

 

Kênaya Nazîme Avras, Mizgîn Avras derheqê babete de qisey kerd.

 

‘Bi caardişê keyfî dayîka mi tahlîye nêkenê’

 

Mizgîn Avras dîyar kerd ke dayîka aye nazîme 2016ine de tepişya ya û 5 serrî badê ameya tahlîyekerdiş la di serrî badê bi îdiayê endamîya rêxistine 2 serrî û aşmêke ceza ameya birnayîş. Mizgîn Avras wina vat: “Cezaya aye badê ke ameye tesdîqkerdiş, bi 10 rojan qerarê zîndanî derheqê aye de ame dayîş. Dayîka mi şî teslîm bî. Vatî do demêk kilm de bêro veradayîş. La heyet bi caardişê keyfî tahlîye nêkeno.”

 

‘Na rewşe nêzdîbîyayîşê hemverê tepişteyanê nêweşan mojnena’

 

Mizgîn Avras wina dewam kerd: “Dayîka mi semedê stresî nêweşîya panîk atakî û qelbî ci dir peyda bîye. Nêweşîya şekir û tansîyonî ya. Semedê emrî rewşa aye her ke şina giran bena. Şert û mercê zîndanî tesîr keno. Na rewşa ke yena ciwîyayîş, nêzdîbîyayîşê hemverê tepişteyan mojnenê. Waştişnameyê ma yenê redkerdiş. Nika heyetî hîrê aşmî tahlîye derg kerd. Ma îtîrazê ceza kerd. Dadgerî qebûl kerd la heyetî red kerd.”

 

‘Werdê înan xirab ê’

 

Mizgîne wina vat: “Dayîka mi rewşa aye baş nîya. Hamnanî tepişteyan koxuşan ra vejenê teber û beran padanê. Dayîka mi heta şan de lingan ser o manena.  Ne baxçe est o, ne banke est a. Tepişteyî bi dore banqê bîyaye nişnenê ro. Werdê înan zaf xirab ê. Kermik û çîyê bînî vejîyenê. Tu cayê dinya caardişêk winasî çin o. Ez venga selahîyetdaran kena. Ganî lezkî heqê tepişteyan bêro dayîş û edalet pê bêro.”