Derya Ren 

 

RIHA - Cinîyê rihayîjî reaksîyon vera hêrişê komê paramîlîter yê girêdayeyê Tirkîya ke hemverê Vakur û Rojhelatê Sûrîye dayê destpêkerdiş, mojnayî û dîyar kerdî ke wazenê prosesê 2014ine Kobanê ameyo ciwîyayîş, ancî bêro kerdiş. Cinîyan dîyar kerd ke pêwa 10 serrî derbaz bî zî zîhnîyet eynî zîhnîyet o.

 

Yew cayê ke bî hedefê hêrişan cayê kesê ke 2018ine de semedê hêrişanê Şehbayî bica bîyî yo. Hêrişan dir yê ke kampanê Şehbayî de mendêne, hetê hêzê pawitişê şarî ra yenê neqlkerdiş.

 

Cinîyê rihayîjî reaksîyon vera hêrişan mojnayî û dîyar kerdî ke wazenê hêrişê 2014ine ke DAIŞî hemverê Kobanê de ca ard, ancî bikerê.

 

‘Kobanê de serkewtiş yê cinîyan bî’

 

Aktîvîsta TJAyî Ferda Oncel da zanayîş ke hêrişan de vernê de cinî hedef yenê girewtiş û vat: “Ma verê prosesê Kobanê de nê vîna. Kobanê de serkewtiş yê cinîyan bi. Ma cinî her tim aştîye esas gênê. Do serkewtiş yê cinîyan bibo. Ganî pêro şar destek bido xoverdayîşî.”

 

‘Hemverê qirkerdişî de bêveng memanê’

 

Endama Meclîsê Şaredarîya Curnêreş Hatîce Goktepe zî wina vat: “Prosesê Kobanê de bi hezaran kesî ameyî qetilkerdiş. Şar warê înan ra ame kerdiş. Qirkerdiş ame ciwîyayîş. Nika wazenê eynî çî bidê ciwîyayîş. Ma senî hemverê şerê Fîlîstînî yê, ganî ma hemverê hêrişê Rojawanî zî bêveng nêmanê. Ganî ma cinî hemverê nê hêrişan de bibê û bêveng nêmanê.”

 

‘Rojawan parçeyêk ma yo’

 

Aktîvîsta TJAyî Çîgdem Karakeçîlî zî wina vat: “Şer de cinî û tutî yenê mexdurkerdiş. Ma şer nêwazenê. Kobanê sînorê Rihayî de yo. Ganî nê semedî ra ma vengê xo berz bikerê. Rojawan parçeyêk ma yo. Şarê ucayî parçeyêk yê ma yo. Her di şarî zî kurd ê. Coka ma ganî kîşte Rojawanî de bibê.”

 

'10 serrî derbaz bî fotograf eynî fotograf o’

 

Endama Meclîsê Şaredarîya Halîliye Rojda Îstek zî dîyar kerd ke dîmenê nika yê 10 serrî dir eynî yê û vat: “Pêwa 10 serrî derbaz bîyo zî tablo û dîmen eynî çîyê. Yê ke tewr zêde mexdur benê, cinî û tut ê. Ma tena Rojawan de nê ma tu cayê dinya de şer nêwazenê. Ganî ma hemverê nê şerî de bibê.”

 

‘Zîhnîyet eynî zîhnîyet o’

 

Aktîvîsta TJAyî Edle Fîdan zî wina ercna: “Ma hemverê nê şerî de yê. Çîyê ke 2014ine de ameyî ciwîyayîş, ma nêwazenê ancî bibê. Name HTŞ beno çi beno wa bibo; ma nê zîhnîyetan nêwazenê. Hêrişê şarê sivîlî kenê. Ma do destûr nêdê ke şarê Rojawanî cayê xo ra bêro kerdiş. Ma do bi destek têkoşîn dewam bikerê.”