MERKEZÊ XEBERAN- Hêrişê rejîmê Îranî yê cinîyanê azadîwazan û ziwanê kurdkî ser o dewam keno. Mamosteya ziwanê kurdkî hetê rejîmê Îranî ra karî ra ameya dûrîvistiş û heqê aye de dewa ameya akerdiş.

 

Komela Heqê Merdiman ê Kurdistanî dîyar kerd ke mamosteya kurdkî Leyla Selîme ya şarê bajarê Sîne ya Rojhelatê Kurdistanî ra ya, hetê Heyetê Cigêrayîşê Sûcanê Îdarî yê Wezaretê Perwerdeyî yê Îranî ra semedê di aşmî karî ra ameya dûrîvistiş.

 

Ame vatiş ke Leyla Selîme bi îdîayê ‘beşdarîya çalakîya sendîka û endambîyayîşê Sendîkaya Mamosteyê Sîne’ ameya cezakerdiş.

 

Leyla Selîme 32 serrî ya, wayîrê tecrubeyê mamosteyîye, eynî demî de çalakîkera Sendîkaya Mamosteyê Sine ya. Heta nika 9 mamosteyê kurdkî hetê rejîmê Îranî ra ameyê dûrîvistiş û tay mamosteyan rê zî cezaya hepsî ameya dayîş.