Derya Ren

 

RIHA - Verfeka Dîplomasîya TAJÊ Sûham Şengalî da zanayîş ke komê SMO yê girêdayeyê Tirkîya, hêrişê HTŞyî yê hemverê hukmatê Şamî îmkan dî û hêrişê Îdareya Xoserî ya Vakur û Rojhelatê Sûrîye kerd û wina vat: “Hêrişê Tirkîya hemverê destkewtişan o. Eke vernîya nê çeteyan nêro girewtiş do tehluke semedê pêro herême derbazdar bibo.”

 

Heyet Tehrir el-Şam (HTŞ) 26ê teşrîna peyêne de hêrişê Haleb, Humusî kerd û xeylêk bajaran kerd binê kontrolê xo. Netîceya hêrişê HTŞyî de Şamî kerdî binê kontorlê xo û rejîmê Baasî yê 62 serrî vist. Badê vistişê rejîmî, rewşa Sûrîye do senî bibo, bî sebebê persan û komê paramîlîter yê Tirkîya herême ke binê  kontrolê Îdareyê Xoserî de yê hêrişê îşxalkerdişî dayî destpêkerdiş. Îdarekarîya Xoser ke hemverê hêrişan xoverdayîşêk pîl mojna, mesajê 2014ine do senî bi ruhê Kobanê xover bidê, dayî.

 

Verfeka Dîplomasîya Têgêrayîşê Cinîyanê Azadan ê Êzidî (TAJÊ) Sûham Şengalî derheqê babete de qisey kerd.

 

Çîyê ke yenê ciwîyayîş hemverê merdimayî yê

 

Sûham Şengalî wina destpê kerd: “Ma wexto ke ewnîyenê, peymanê mîyanneteweyî dewre de yê. Semedo ke demê hêrişî dest pêkerdî hukmatê Şamî û Rûsya xo peyser ant. Verê zî wexto ke dewleta tirkan hêrişê Efrîn, Serêkanîye û Girê Spî kerd, DYA xo peyser antibî. Bi hêrişan waştî ke şar bitersnê. Hêrişan de tabloyê 2014ine ke DAIŞî hêriş kerdî, yeno vînayîş. Yanî îşkence û qetilkerdiş û caardişê bêmerdimayî est ê. Hedef Îdareyê Xoserî yo. Amancê HTŞyî vistişê hukmatê Şamî bibo; hêrişê Tirkîya destkewtişê kurdan o. Vernîya nê nêro padayîş, do tehluke semedê pêro herême derbazdar bibo.”

 

‘Ma zîhnîyetê DAIŞî vînenê’

 

Sûham Şengalî wina dewam kerd: “Çi destê ma ra bêro ma do bikerê. Semedo ke qirkerdişê 2014ine de cinîyê êzidî çi ciwîyayî, nika Vakur û Rojhelatê Sûrîye de yeno ciwîyayîş. Ma zîhnîyetê DAIŞî nika vînenê. Nê semedî ra zî ganî ma bêveng nêmanê. Ma sey TAJÊ senî semedê cinîyanê êzidîyan têkoşîn kerd, ma do nika zî bikerê. Wezîfeyê ma yê esas no yo.”

 

Semedê sazgehê heqê merdiman vengdayîş

 

Sûham Şengalî vat, ganî bi ruhê Şengal û Kobanê xo ver bidê û wina vat: “Pawitişê şarê ma, wezîfeyê ma yo esas o. Nika pêro şar pîya xo ver dano. Hemverê komelî û cinîyan, hêrişê çimsûrî pê anê. Ma sey TAJÊ venga pêro dezgehan kenê. Ma hemverê hêrişan bibê wayîrê helwestê hempar. Ma destûr nêdanê nê hêrişan.”