ŞIRNEX - Dîlan Durmuş ke digane semedê welidnayîşê wedarnayî nêweşxaneyê Elkê, bi sebebê “pisporê/a welidnayîşî çin o/a” mudaxale nêame kerdiş, dinyaya xo bedelnaye. Dîlan Durmuş ke tuta aye nêweşxaneyî bî, semedo ke gonîya aye zerîya aye ra şî, dinyaya xo bedelnaye.

 

Cinîya bi nameyê Dîlan Durmuşa 30 serrî ke digane bîye, şewa bîne dejî ra wedarnayî Nêweşxaneyê Dewlete ya Elkî ya Şirnexî. Goreyê agahîyan; Dîlan Durmuşa digane ciwîkî bî, tutêk aye keye de bî. Hema tutê aye yê diyîne nêbî, rewşa aye giran bî û wedarnayî nêweşxane. Nêweşxaneyî ci ra vat, “pisporê/a welidnayîşî çin o/a” û mudaxele nêame kerdiş. Demêk badê zî tutê aye yê diyîn nêweşxaneyî bî. Dîlan Durmuşa demê welidnayîşî de gonî aye ra şîya, dinyaya xo bedelnaye.

 

Keyeyê Dîlan Durmuş ke xo resna Ajansê Mezoptamyaye (MA)  vat bêeleqedarîya nêweşxaneyî ra dinyaya xo bedelnaye û vatî: “Vizêr dejê aye yê welidnayîşî estbî. Diganeya ciwikan bî. Tutê aye yew keye de bî, o bîn nêbî. Rewşa aye giran bî û ma zî berd nêweşxane. Labelê nêweşxane de ma rê vat,  ‘doktorî çin ê’ û mudaxele nêkerdî. Tutê aye bîn zî uca de bî û gonî aye ra şî û dinyaya xo bedelnaye. Nêweşxane de doktorî çin ê. Ma de doktor çin o. Ma do çend kesê bînî semedê çinbîyayîşê doktoran, tehluke ra dinyaya xo bibedelnê.”