DÊRSIM - Dêrsim de cinîyan serkêşîya TJAyî de li hemverê tayînkerdişê qeyûman bi sloganê “Jin, jîyan, azadî” rayîrşîyayîş organîze kerd û vatî: "Ma do ê sere nêtewênenê.”

 

Reaksîyonê hemverê qeyûmî tayînê şaredarîyê Dêrsim û Pulurî ameyî kerdiş, dewam kenê. Serkêşîya Têgêrayîşê Cinîyanê Azadan (TJA) de cinî hemverê desteserkerdişê îradeyî rayîr ra şîyî. Cinîyê Edene, Mêrsîn, Xarpêt, Çewlîg û Amedî Kuçeyê Sanatî yê Dêrsimî de ameyî têhet.  

 

Bi serkêşîya Têgêrayîşê Cinîyanê Azadan (TJA) bi seyan cinî Dêrsim de kom bîyî û hemverê desteserkerdişê îradeyî bi sloganê “Jin Jiyan Azadî” “Dêrsim ê ma yo, Şaredarî ê ma ya”, “Biciwîyo xoverdayîşê cinîyan” “Biciwîyo têkoşînê cinîyan” rayîr ra şîyî. Cinîyan rayîrşîyayîş de pankartê “Hemverê xespkerdişê qeyûmî biciwîyo paştdayîşê cinîyan” akerdî û rayîr ra şîyî. Cinîyan destpêkê rayîrşîyayîşî de heta peynîya rayîrşîyayîşî bêmabên sloganê “Jin Jiyan Azadî” berz kerdî. Rayîrşîyayîş de temsîlkarê EMEK, DEM Partîye, Cemxane, Parlamentera DEM Partî Halide Turkoglu û Ayten Kordu, temsîlkarê KESK û Hemsereka Tarim Orkam Senî, îdarekarê DEM Partî û TJAyî yê Amed, Mêrdîn, Mêrsîn, Anqara û Stenbolî de amade bîyî.

 

'Qeyûm zilm o’

 

Hemsereka DEM Partîye ya Dêrsimî Esma Ateş bi kirmanckî qisey kerd û wina vat: “Ewro Anqara, Mêrsîn, Stenbol, Amed, Mêrdîn ra hevalê ma ameyî. Ez xêrameyîşê hemîne kena. Qeyûm talan o. Qeyûm zilm o û xoza, herra Dêrsimî ser o zilm o. Qeyûm hêrişê destkewtişê cinîyan keno. Ma qeyûm nêwazenê. Ma wazenê şar îdareyê xo rayîr ra bero. Ma qeyûm nêwazenê.”

 

‘Kesêk nêeşkeno îradeyê şarî xesp bikero'

 

Endama Cemxaneyê Mêrsînî Aysel Klavuz Demîr, Hemsereka AYKAY-DERî Suphiye Bayav û koma Feminîstê Xoserî Îlgî Kahraman zî çalakîye de vatî ke kesêk nêeşkeno îradeyê şarî xesp bikero do hemverê  nê nêheqî de heta peynî xo ver bidê, do sere nêtewênê.