Gulîstan Gulmuş

 

DÊRSIM - Hemşaredara Dêrsimî Bîrsen Orhan ke qeyûm tayînê vera ci ame kerdiş û tepişya, dîyar kerd ke amancê sereyîn ke ê wazenê destkewtişê cinîyan vejê vernî. Bîrsen Orhan cinîyê ke hemverê qeyûman xo ver danê zî bi sloganê "Jin Jîyan Azadî" silam kerd.

 

21ê teşrîna peyêne de qeyûm tayînê Şaredarîya Dêrsimî ame kerdiş. Badê nê welatijê Dêrsimî hemverê desteserkerdişê îradeyê xo dest bi xoverdayîşî kerdî. Çalakîyan de 9 kesî destbend bîyî.  Bajar bi barîyerê ke ci de ame bicakerdiş, açarya baregehê leşkerî. Dêrsim de çalakîyê hemverê qeyûman dewam kenê. 

 

Hemşaredare Bîrsen Orhan ke destbend bî badê ameye veradayîş û badê 2 rojî dima 30ê teşrîna peyêne de ancî keyeyê xo Pêrtagî de destbend bî. Bîrsen Orhan ke badê îfadeyê aye hetê dozgerîya Edliyeyê Tûncelî ra ame girewtiş, bi îdiayê "Semedo ke karê xo nêkero xo ver daya”  û "Hemverê polîsan de xo ver daya” ameye tepiştiş.

 

Bîrsen Orhan vernîya ke bêro tepiştiş, ajansê ma rê qisey kerdebî. Ma qiseykerdişê Bîrsen Orhan pêşkêşê şima kenê.

 

Bîrsen Orhana ke sere de qalê cuya xo kerd wina vat: "Ez Hemşaredara Dêrsimî Bîrsen Orhan a. Melegê mi mamostetî yo. Mi serra 2013ine de sey Hemsereka HDPyî ya qezaya Pertekî dest bi sîyaset kerd. Badê zî mi sey Verfeka HDKyî ya Qezaya Pertekî xebate dewam kerd. Tewr peyîn ez di îdareyê DBPyî yê Amedî de şuxilyaya. Çira hemserekî? Çike merkezê sîyasetê DEM Partî de cinî est a. Binê sîwanê DEM Partîye de sey cinî mîyanê sîyasetî de cagirewtiş, semedê mi sey ke ez temamê Dêrsimî rê xebate bikerî yo. Bi berpirsîyarîyê ke şarê Dêrsimî da mi, sey hemserek mi dest bi xebate kerd."

 

'Mi waşt ke ez zî ala têkoşînê cinî hîn berzêr bikerî’

 

Birsen Orhan dewam de wina vat: “Xebatê zêdekerdişê yê cinî helbet mîyanê DEM Partîye de yo û semedo ke mi wina vînayîne ke DEM Partîye ala temsîlkarîya cinîyan wedarnaya. Seke şima zî zanê  Dêrsim bajarê cinîyan o. Sereka baroyê ma yê verê cinî bî, parlamentera ma ya nika cinî ya û xeylêk wareyan de temsîlkarîya ma cinîyan est a. Semedê nê mi waşt ke ez bibî beşêk nê çemberî. Verê demê şaredarîya ma de kesê sey Edîbe Şahîn û Songul Erol Abdil temsîlkarîya cinîyan kerdêne. Na mana de mi waşt ez nê sîyasetî de ca bigîrî.”

 

Dêrsim xo ver dano û do semedê probleman bibo cewab

 

Bîrsen Orhan dîyar kerd ke têkoşîn dewam keno û wina vat: “Ma kombîyayîşê cinîyan organîze kerd. 25ê teşrîna peyêne roja ku cezaya hemşaredarê ma Cevdet Konak neql bî, çarçewaya şîdetê cinîyan ser o xeylêk çalakî ma organîze kerd. Ma şîn de nîyê. Têkoşîn tena bi şaredarîyan sînordar nîyo. Munaqeşe est o ke şaredarî cayêk ke eşkena xeylêk lazimîyê şarê Dêrsimî ca bîyaro ya. Ma do no wareyî de xebatanê xo dewam bikerê. Belê ma zanê belkî awankerdişê keyeyan de, baxçeyan de zehmetîyan biancê la şarê Dêrsimî do timî berê xo ma rê abikero.”

 

'Ez xoverdayîşê cinîyanê Dêrsimî Silam kena'

 

Bîrsen Orhan tewr peyîn wina vat: "Ez xoverdayîşê 22yê teşrîna peyêne yê cinîyanê Dêrsimî bi rêzdarî û heskerdiş silam kena. Ê xeylêk xurt bî, ma dir bî. Hîs  û ruhê înan yê têkoşer a roje xeylêk zelal bî. Cinîyê Dêrsimî bîyî sembolê a roje. Semedo ke ez Dêrsim de bîya û ez dêrsimij a xeylêk şanaz bîya. Cinîyê dêrsimijî baş zanê ke têkoşîn şaredarî dir sînordar nêmaneno, do no têkoşîn heta peynî bibo. Ê baş zanê ke do hemverê her tewir bêhuqûqî de vengê xo berz bikerê û ez vana, 'Jin, Jiyan, Azadî’.”