Neslîhan Kardaş

 

BÊDLÎS - Hemsereka MEDYA-DERî Emîne Dîkmen Irgat bale ant muhîmîyê ziwanê kurdkî ser o û vat: “Ganî ma wayîrê sazgehê xo yê ziwanî vejîyê. Ganî ma wayîrê ziwanê xo vejîyê. Eke ziwanê ma vînî bibo, ma zî vînî benê.”

 

Hemsereka Komeleya Ziwan û Edebîyatî (MEDYA-DER) ê Tetwanê Bedlîsî ke 7 aşmî yo ameya akerdiş û 5 aşmî yo komele xebatanê xo dewam kena, Emîne Dîkmen Irgat, derheqê muhîmîyê ziwanî de ercnayîş kerd.

 

'Vînîbîyayîşê ziwanê kurdkî yeno manaya çinbîyayîşê şarê kurdî’

 

Emîne Dîkmen Irgat dîyar kerd ke hemverê kurdkî de tehemul çin o û vat: “Ganî ma semedê ziwanê xo xebatêke xurt bikerê. Ganî ma her ca de ziwanê xo qisey bikerê û ziwanê xo vînî nêkerê. Ziwanê ma bîyayîşê ma yo û ganî ma ziwanê xo bipawê. Çinbîyayîşê ziwanê kurdkî, yeno manaya çinbîyayîşê şarê kurdî. Terso tewr pîl yê kurdan cuyêka bêrûmet a û cuya bêrûmet zî çinbîyayîşê ziwan û kulturê ma yo. Semedê nê zî destê ma ra çi bêro ma do bikerê.”

 

'Ganî her mektebî de perwerdeyê kurdkî bibo’

 

Emîne Dîkmen Irgat, dewam de wina vat: “Ez her tim wazena ke bi ziwanê xo ma biciwîyê. Ganî ma semedo ke tutê ma bi ziwanê xo perwerde bivînê, ma muracat bikerê. Semedo ke tutê ma keye de kurdkî qisey kenê la wexto ke şinê mekteb ûca de perwerdeyê bi tirkî vînenê û ziwanê xo xo vîr ra kenê. Wexto ke ziwanê xo xo vîr ra kenê asîmîle benê û reyke bîn nêeşkenê ziwanê xo bimusê. Semedê nê zî ganî her mektebî de perwerdeyê bi kurdkî bibo."

 

'Ganî ma her wareyê cuya xo de bi kurdkî qisey bikerê’

 

Emîne Dîkmen Irgat, tewr peyîn wina qalî kerd: “Hemverê asîmîlasîyonî de ganî ma zêdeyêr bişuxilyê. Semedo ke no berpirsyarî tewr zêde keweno milê ma ser o. Ganî ma tutanê xo dir her tim kurdkî qisey bikerê. Ma cuya rojane de zî kurdkî qisey bikerê. Tena bi no hawa ma eşkenê polîtîkayê asîmîlasyonî veng vejê. Vengdayîşê mi her kesî rê oyo ke sazgehê ziwanî, kultur û ziwanê xo bipawê. Eke ma ziwanê xo nêpawê do ziwanê ma vînî bibo, vînîbîyayîşê ziwanê ma zî yeno manaya çinbîyayîşê ma.”