AMED - DBPyî hemverê hêrişê Vakur û Rojhelatê Sûrîye û Helebî ser o venga reaksîyonmojnayîşî kerd û wina vat: “Bi destê çeteyan, Sûrîye û Rojawan de  şar yeno hedefgirewtiş û amancê esasî zî paradîgmaya cuya newe ya demokratîke û azadîwaştoxî ya cinîye yo.”

 

Heyetê Îdareyê Merkezî (MYK) ê Partîya Herêmî ya Demokratîke (DBP) derheqê hêrişê Vakur û Rojhelatê Sûrîye û Helebî ser o eşkerayîyêke nuşteyî da.

 

DBPyî eşkerayîye xo de dîyar kerd ke hêzê serdest-kolonyalîstî bi Şerê Hîrêne yê Dinya hewl danê form bidê Rojhelatê Mîyanên, na çarçewa de Heleb, Idlib û Til Rifat hedef ameyî girewtiş û no çî bêîstîqrarîyê herême xorîn keno. DBPyî dîyar kerd ke sere de Erdogan-Bahçelî, hêzê herême ser o pey berjewendîyê sîyasî, bi konseptê şerêk newe Rojhelatê Mîyanên ablûqayê krîzan de verdenê.