Gulîstan Gulmuş

 

21ê teşrîna peyêne de qeyûm tayînê şaredarîya Dêrsimî ame kerdiş û bajaranê cîya ra paştdayîş ame dayîş. Nînan ra yewe zî aktîvîsta Kongreya Îslamî ya Demokratîke (DÎK)  Hatîce Şeker ke komîsyonê bawerî û şaran ê Partîya Têduştî û Demokrasî (DEM Partî) de xebatan kena ya. Hatîce Şeker dîyar kerd ke paştdayîş muhîm o û derheqê  qeyûman de ercnayîş kerd.

 

‘Çira ma şinê weçînayîşan’

 

Hatîce Şeker wina dîyar kerd: “Ma bi hukmatêk ke her hetî ra kewto sewîyeya tewr cêrî dir rî bi rî yê. Semedê polîtîkayê zext û zulmî hewl dano şarî bipelçiqno û hawirê tersî awan bikero. Semedo ke şarî bênasname bêîrade verdo xebatan keno. Ma do her tim hemverê nê polîtîkayan de têkoşîn bikerê. Caardişê qeyûmî xesp û talan o, dizdî yo. Madem bi polîtîka qeyûm ti dewam kenê, o wext ti çira weçînayîşan kenê? Çira ma xo xapênenê, çira meclîsêk ma est o?”

 

‘Her reye ma weçînayîşan qezenc kenê’

 

Hatîce Şeker dewam de wina vat: “Qeyûm derbazdar ê, ma mende yê. Ma do xoverdayîş dewam bikerê. AKP-MHP cayê ke vînî kerdê, bi  xespkerdişî dizneno. Ma herra Seyîd Riza yê. Dêrsim wayîrê kulturêk qedîm o û parçeyêk Kurdistanî yo. Seyîd Riza vat, ‘Mi hemverê xîleyanê şima de sere nêant la mi zî sere nêtewêna.’ Şarê  Dêrsimî xo ver da, do xo ver bido. Ewro Dêrsim o, siba Amed o û roja bîn Agirî yo. Şarê kurdî bi xoverdayîş cewab dayo nê zulmî. Şarê kurdî her tim weçînayîşan de ser kewto.” 

 

‘Ganî xoverdayîş bêro dewamkerdiş’

 

Hatîce Şeker tewr peyîn wina vat: “Hemverê qeyûman veng nêro vetiş do mudaxaleyê xeylêk cayan bêro kerdiş. Semedo ke vernî bêro padayîş, ganî hawirê tersî ra xelasbîyayîş bibo. Ganî nê hetî ra xoverdayîş dewam bikero.”