Di dîrekan ra yewe de di kamera est ê 2026-07-10 09:10:11   Rabîa Onver - Dîlan Babat   COLEMÊRG - Gever de polîtîkayê asayîşî mîyanê serran de şekil bivurnê zî, vatişê roniştoxanê taxe nêvurîyenê. Şarê taxa Ormanî yo ke binê kamerayanê Mobeseyî, wesayîtanê zirxîyan û midaxaleyanê polîsan de ciwîyeno wina vat: “Vanê proses est o labelê zextî nêqedîyenê. Ganî polîtîkayê taqîbkerdişî peynî bibê.”   Qeza Geverî ya Colemêrgî de, merkezê bajarî de 20ê Sibate de taxan de zî nêzdîyê di serrî yo kamerayê mobeseyî ameyî bicakerdiş. Na tora taqîbkerdişî hetê Geverî ra tabloyêk neweye nîya. Polîtîkayê asayîşî yê ke dimayê prosesê îdarekarîya xoserî ameyî kerdiş, pêwa serran bi hawayê cîya yenê rayraberdene.   Taxa Ormanî de bi şewe tenê lambeyî nêabênê. Dekewtişê taxe de kuçeyan de, verê mekteban de, park û cadeyan de mobeseyî ameyî bicakerdiş û 24 saetan taxe yena taqîbkerdiş. Pêwa nê, nuqteyê polîsan û qerekolî zî rîyê bîn ê polîtîkayanê asayîşî dewam kenê. Ciwanî her şewe hedefê midaxaleyê polîsan de yê.     Her di dîrekan de di kamerayî   Kuçeyan de êdî tena merdimî nê, kamerayî zî serdest ê. Ciwanî bi xususî saetanê şan de ke wazenê bivejîyê teber, bi desine rey yenê vindarnayîş. Eynî kesî mabênanê kilman de reyna reyna bi kerdişê kontrolê kîmlîk û GBTyî rî bi rî manenê.   No kerdiş vurîyayo rewşêka ke tesîr pêroyîyê ciwîyayîşê cimatî keno. Hetê kesanê ke taxe de ciwîyenê ra babete tena estbîyayîşê kamerayan nîya; bi nê taqîbkerdişî dir hîsê ke her tim yenê kontrolkerdişî zî virazîyeno.     ‘Ma nêşenê verê beranê xo de ronişê’   Pakîze Işike da zanayene ke bi serran o taxa înan binê zextî de ya û va zextê ke yenê ciwîyayene û gazê îsotî yê ke yenê şixulnayîş tesîr ro tutan û kesanê astengdaran keno û wina va: “Taxa ma de mobeseyî ameyî bicakerdiş. Ma wazenê bêrê wedaritene. Panzerî heta ereyê şewe taxe de geyrenê û gazê îsotî erzenê. Ciwanan rê zextan kenê. Wextê ke ma keye ra şinê sûke nasnameyanê ma gênê û ma nêrehet kenê. Ma wazenê mobeseyî bêrê wedaritene. Mobeseyî zerreyê keyeyanê ma zî vînenê.”   Esmer Aşkane zî dîyar kerd ke polîsî ewilî erzenê taxa Ormanî ser û va, mobeseyî înan nêrehet kenê û ganî lezkî bêrê wedaritene.