‘Hêrişê Rojawanî hemverê prosesê aştîye yê’ 2026-01-22 11:26:14   Buşra Turan   WAN– Endama MYK’a TJA’yî Felek Erdem hêrişê hemverê taxanê Şêxmeqsûd û Eşrefîye yê Helebî ercnayîş kerd û va nê hêrişî dewamê zihniyetê DAIŞî yo û wina va: “Ganî Tirkîya fek ziwanê şerî ra vera bido. Ganî goreyê peymana 10ê Adare têbigêro.”   Çeteyê HTŞ’yî bi piştîdayîşê Tirkîya 6ê çeleyî de hêrişê taxanê Şêxmeqsûd û Eşrefîye yê Helebî kerdî. Hêrişan de hêzê asayîşê zereyî û sivîlî hedef ameyî girewtiş, zaf kesî ameyî qetilkerdiş. Xeylêk kesî birîndar bî û îşkence tutan rê ame kerdiş. Aqûbetê xeylêk sivîlan nîno zanayîş. Pêwa nê hêrişan xoverdayîşê taxanê kurdan dewam keno.   Aktîvîsta Têgêrayîşê Cinîyanê Azadan (TJA) Felek Erdem derheqê hêrişê HTŞ’yî hemverê kurdan de qisey kerd.   ‘Ganî Abdullah Ocalanî dir dîyalog bêro awankerdiş’   Felek Erdem da zanayîş ke hedefgirewtişê cinî û tutê Rojawanî dewamê zîhnîyetê DAIŞî yo û va: “Hêrişî bi armancê vengvetişê cigêrayîşê çareserîya demokratîke yo. Ganî Tirkîya fek ziwanê şerî ra vera bido û Abdullah Ocalanî dir rayîrê diyalogî abikero. Prosesê aştî û cimatê demokratîkî 27ê sibate ra heta nika yenê qiseykerdiş. Tesîrê pozîtîfî ameyî peydakerdiş. Hêrişê Rojawanî hêrs û endîşeyê girdî awan keno. Demo ke aştî yena ciwîyayene, hêrişî aştîye kenê asteng. Hêrişê hemverê taxê Eşrefîye û Şêxmeqsûdî de hovîtîyêk gird o.”   ‘Yê tewr zêde aştî wazenê cinî yê’   Felek Erdem dîyar kerd ke metodê hêrişê yenê ciwîyayene zîhnîyetê DAIŞî mojneno û wina va: “Ma şiklê qetilkerdişê çeteyan nas kenê. Ma serra 2013-2014-2015ine ra pratîkê DAIŞî zanê. Ê ke ewro ma Rojawan de vînenê DAIŞîj ê. Dîmenê vejîyayê orte bîyê sebebê hêrsî. Eştişê bedenê cinî nîşanê zîhnîyetê DAIŞî yo. Dîmenê tutan û cenazeyan sebebê hêrsî yo. Ma her tim vanê yê tewr zêde aştî wazenê cinî û dayîkî yê. Dejo tewr gird ê ancenê.”   ‘Çinhesibnayîşê peymana 10ê Adare nîno qebûlkerdiş’   Felek Erdem dîyar kerd ke ganî raya pêroyî rewşe bivîno û va: “Orte de sûcê merdimîyêk gird est o. Weşanî yenê birnayîş û dîmenê îşkenceyî yenê astengkerdiş. Nê semedî ra ganî lezkî heyetêk xoser şêro herême û zîhnîyetê DAIŞî cayê ci de cigêrayîş bikero û rapor amade bikero. Ancax nê wina eşkenê vejê orte. Proseso ke peymana 10ê Adare yeno munaqeşekerdiş de peymane yena çinkerdiş. No nêeşkeno bêro qebûlkerdiş. Hêrişê Rojawanî hemverê prosesê aştîye yo. Semedo ke aştî bêro qiseykerdiş ganî Tirkîya fek polîtîkaya şer û piştîdayîşê DAIŞî vera bido. Ma cinîyê kurdî yê Vakurî vanê semedo ke aştî bêro qiseykerdiş ganî Tirkîya fek ziwanê şerî ra verabido.”