‘Hêrişê Helebî ser o tesaduf nêbî’ 2026-01-19 11:04:58   Derya Ren   RIHA - Verfeka PYD’yî Sema Begdaş derheqê hêrişê çeteyanê HTŞî yê Vakur û Rojhelatê Sûrîye ser o va: “Rijnayîşê rejîmê Baasî dir, hemî hêzî wazenê Sûrîye ra parêk bigîrê; hêrişê Helebî, Şêxmeqsûd û Eşrefîye beşêk nê komployê zafhetî yo.”   Hêrişê Heyetê Tehrîr El Şam (HTŞ) û çeteyê ke hetê Tirkîya ra yenê destekkerdiş, herêma Îdareya Xoserî ya Vakur û Rojhelatê Sûrîye dewam ser o kenê. Derheqê na babete de, Hêzê Demokratîkî yê Sûrîye (HSD) diyalogê xo bi hêzê mîyanneteweyî û sewbîna Hukmatê Demkî yê Şamî dir dewam keno. Fermandarê Pêroyî yê HSDî Mezlûm Ebdî neql kerd ke ê resayê neqlkerdişêk û do hêzê xo Dêrazor û Reqqayî ra biancê ke semedê vernîgirewtişê girankerdişê şerî. Na mabêne de, yeno pawitiş ke Mezlûm Ebdî ewro şêro Şam, semedo ke pêvînayîş El Colanî dir bikero.   Verfeka Partîya Yewîya Demokratîk (PYD) Sema Begdaş derheqê babete de ercnayîş kerd.   ‘Komployêk zafhetî ame kerdiş’   Sema Begdaş dîyar kerd ke Rojhelatê Mîyanên vurnayî û vurnayîşêk pîl ciwîyeno û va: “Hedîseyê ke dimayê rijnayîşê rejîmê Baasî qewimyayî destpêkê nê bî. Heme hêzî wazenê para xo Sûrîye ra bigîrê. Nê semedî ra kombîyayîşî yenê kerdiş û tifaqî yenê viraştiş. Dimayê her kombîyayîşî rewşe zelalêr bena. Hêrişê Şêxmeqsûd û Eşrefîye newe nîyê. Her ke Tirkîya serdayîşê Şamî kena, hêrişî dest pêkenê. Hêrişê Helebî sey beşêk komployêk zafhetî ameyî kerdiş. Hukmatê bîyaye yê Şamî ne semedê diyalogî ne zî semedê demokrasî amade nîyo.”   ‘Çîyê ke qewimîyayî Sûrîye ver bi şerî beno’   Sema Begdaş dîyar kerd ke bi seyan sivîlî ameyî qetilkerdiş û va: “Çîyê ke qewimîyayî Sûrîye ver bi şerî beno. Çîyê ke her di taxan de qewimîya qetlîamêk bi, labelê hemverê nê de xoverdayîş zî estbi. Ewro kurdî pêro dinya de hemverê hedîseyê ke her di taxan de qewimîyayî bîyê yew. Her şervanêk uca de rolê xo kay kerd û çalakîyêke girdî mojna. Çeteyan bi xo dîmen weşan kerd.”   ‘Vengdayîşê semedê diyalogî hema zî derbasdar o’   Sema Begdaş dîyar kerd ke Îdareya Xoserî hewl dana ke pêrodayîşan peyînî bikero û va: “QSD eşkerayîya xo de her tim muhîmî dano dîyalog. Koalîsyon bi xo hêrişê çeteyan Derhafirî de dî. Hukmatê Demkî yê Şamî demêk de hêrişêk da destpêkerdiş ke QSD anciyabi. No nîşan dano ke dewleta tirkan zî nê çî de para xo est a. Vengdayîşê QSD’yî yê semedê diyalogî hema derbasdar o. Ê muhîmî danê peymana 10ê Adare, labelê hukmat wezîfeyê xo bica nêano. Hêrişî bi giranî dewam kenê, labelê xoverdayîş zî dewam keno.”   ‘Maskeyê her kesî kewt’   Sema Begdaş qalê yewîya şarî hemverê hêrişan kerd û va: “Ma nê çî Kobanê de bi zelalî dî. Ewro her hêrişêk her cayê Kurdistanî de do tesîrê beşê bînî zî bikero. Kurdî her çar parçeyan de eke bieşkê do yewîya xo awan bikerê, tu hêz nêeşkeno hemverê înan de vindero. Şarê kurdî semedê merdimîye têkoşîn kerd û dewam keno. Vengdayîşê ma semedê heme partîyanê Kurdistanî no yo: Bêrê ma bibê yew û planê înan pûç bikerê. Hêrişê ke ameyê kerdiş de, maskeyê her kesî kewt.”