Roportajê semedê Gulîstane û Rojîne sûc ame hesibnayîş!

2025-11-05 15:46:27


	 

	MÊRSÎN - Roniştişê dewaya Şehrîban Şeker ke semedê roportajê derheqê Gulistan Doku û Rojîn Kabaîş de yena muhakemekerdiş, ame kerdiş.

	 

	Serdozgerîya Komara Mêrsînî, semedê roportajê derheqê Rojîn Kabaîş û Gulistan Dokuye de, derheqê endamê Komeleya Cinîyanê Mîmozayê Şehrîban Şeker ke bi îdîayê “agahîyanê xeletan şarî rê pare kena” îdîaname amade kerd. 15ine Dadgeha Cezaya Pêroyî ya Mêrsînî zî îdîaname qebul kerd û bi eynî îdîayî dewa akerd.

	 

	Dozgerî, roportajê Şehrîban Şekere ke 6ê Gulane 2025ine de derheqê Rojîn Kabaîş û Gulistan Doku Ajansê Mezopotamyayî (MA) de ame parekerdiş, sey “sûc” mojna. Semedê vatişê Şehrîban Şekere “Delîlî yenê çinkerdiş, hewl danê sey înxtîhar bimojnê û cînayetê cinîyan yenê nimitiş” îdîayê “agahîyanê xeletan parekerdiş” ame kerdiş. Dozgerî waşt ke Şehrîban Şeker madeyê 217/A û 53ine de bêro cezakerdiş û hîn heqanê xo ra bêpar bimano.

	 

	Şehrîban Şeker û avûkatê ci tewrê roniştişê bî. Platformê Cinîyanê Mêrsînî zî dewa taqîb kerd. Salone de polîsê sivîlî estbî û avûkatan reaksîyon mojna. Şehrîban Şeker pawitişê xo de va ke vatişê ci çarçewaya îfadeyê keyeyî û avûkatê Rojîn Kabaîş û Gulistan Dokuye de yê û va tu agahîyê xeletî roportajê aye de çin o. Şehrîban Şeker waştişê beraetê xo kerd.

	 

	Avûkatê Şehrîban Şekere zî va ke esasê sûcan nêvirazîyayo û waştişê beraetê miwekala xo kerd.

	 

	Dozgerî, semedê amadekerdişê mutalaayî dem waşt. Dadgerî zî nê waştişî qebul kerd û roniştiş taloqê 7ê teşrîna peyêne kerd.

	 

	Platformê Cinîyanê Mêrsînî zî vernîya roniştişî de verê edlîye de eşkerayî da û reaksîyon vera dewa mojna. Hatîce Şahîn eşkerayîye de va ke na dewa hemverê heme cinîyan a û waşt ke qetilkarê cinîyan bêrê muhakemekerdiş.