Zozananê Korxanî de vernîya tîje cinî wurzenê

2025-08-28 11:14:52


	 

	
		Neslîhan Kardaş
	
		 
	
		ÎDIR - Cinîyê zozananê Korxanî, vernîya vejîyayîşê roje de aya benê û pêro giranîya roje gênê milê xo ser. Pêwa pêro zehmetîyê cuye zî cinîyê ke hema bêrîvantî kenê, dîyar kerdî ke zozanan de tewr zêde cinî rincan bîyê.
	
		 
	
		Wexto ke hewayê deşta Korxanî ya Îdirî germ bena, vengê gamanê bêrîvanan dest pêkeno. Ê vernîya vejîyayîşê roje şîyar benê û dimayê ke karê xo şan de qedênenê, çadirê ke înan dayê ro de konê ra.
	
		 
	
		Bêrîvanê deşta Korxanî bi kilmî cuya xo ser o qisey kerdî.
	
		 
	
		Temamê roje şuxilênê
	
		 
	
		Ayşe Temel, dîyar kerd ke ê semedê debara xo yenê  zozanan. Ayşe Temel va, "Hîn keyeyî semedê dimayê roşanê Newroze dest bi ameyîşê zozanan kenê. Yê ke zozanê înan çin ê, hîna erey yenê. Semedo ke ma xeylê cuya xo zozanan de derbaz kenê, ma eşkenê xeylêk hetê cuya bajarî de peyser bimanê. Rojê ma zaf xidar û rincan ê. Ma saete çarê sibayî de aya benê. Ma dest bi karê xo yê rojane kenê. Ma heta şan de bêmabêne şuxilênê. Ma hema hema temamê roje bi solanê xo şuxilênê."
	
		 
	
		'Ma nîmeyê keda ke danê nêgînê'
	
		 
	
		Ayşe Temel, dîyar kerd ke karê înan heta şan de peynî nêbeno û dîyar kerd ê zaf rincan benê û va: "Beşê tewr xidar ê cuya ma dûrmendişê xeylêk çîyan o. Ma şitê heywananê xo şuxilnenê ke sey  rûn û peynîr virazênê. Demo ke rotixî yenê, ma înan roşenê. Ma tîya mecbûrê ke berardişanê xo erjan biroşê. Ma nîmeyê keda xo ya ke danê, nêgînê. Wexto ke hewa payîz de serd beno, ma şinê keye." 
	
		 
	
		'Na cuye de çîyêk bêrincan çin o’
	
		 
	
		Dima ra Fatma Çakmaza 65 serrî dîyar kerd ke a nêzdîyê 40 serran o bêrîvan a û va, "Wexto ke hewa dest bi germbîyayîşî keno, ma yenê koyanê berzan. Ma karê xo yê rojane kenê. Ma serê sibayî rew wurzenê û manganê xo ancenê. Ma şito ke heywananê xo ra gênê, makîneyan ra derbaz kenê. Cuye tîya zaf xidar a la hetê ci yê pozîtîfî est ê. Na cuye de çîyêk bêrincanî çin o. Ma zî xeylêk zehmetî ancenê. Cinî tîya tewr zêde bî rincan. Her tim cinî heywanan ancenê. Eynî wextî de cinî peynîr û rûn viraznenê.”