Nîbel Genç dimayê 31 serrî dima amî tehlîyekerdiş

2025-08-20 15:34:27


	 

	 

	STENBOL - Nîbel Genç dimayê 31 serrî yê tepişte bî, serbest amî veradayîş, wexto ke Zîndanê Cinîyan ê Bakirkoyî ra vejîya, bi sloganê "Jin jiyan azadî" amî pêşwazîkerdiş.

	 

	Nîbel Genç dimayê 31 serrî Zîndanê Cinîyan ê Bakirkoyî ra serbest amî veradayîş. Ganî 14ê êlula 2024ine de biameyîne veradayîş la semedê cezaya dîsîplînî tehlîyeyê aye amebî astengkerdiş. Dimayê serbestveradayîşî, Nîbel Gençe, endamê Têgêrayîşê Cinîyanê Azadan (TJA), îdarekarê qezayan ê Partîya Têduştî û Demokrasî (DEM Partî) û Komeleya Hetkarîya Keyeyê Tepişteyanê Marmarayî (MATUHAYDER) ra bi çepikan amî pêşwazîkerdiş.

	 

	Xeylêk tepişteyî hema zîndan de yê

	 

	Nîbel Genç, ke bi sloganê "Jin jiyan azadî" amî pêşwazîkerdiş, qiseykerdişêk kilm kerd. Aye sipasiya her kesî kerd ke semedê pêşwazîkerdişê aye ameyî û dîyar kerd ke hema zî xeylêk tepişteyî zîndan de yê. Nîbel Genç hêvîya xo ard ziwan ke tepişteyî tewr lez bêrê veradayîş.